Ислом Аҳмедов клубини қандай қилиб икки марта чемпионликка етаклади? Уни нега истеъфога чиқаришди? Кейинги режаси қандай? Чемпион мураббий билан суҳбат

Маълумки, Қирғизистон чемпионатида “Абдиш Ата” клубини кетма-кет икки йил мамлакат чемпионига айлантира олган ўзбек мураббийи Ислом Аҳмедов куни кеча жамоадан истеъфога чиқди.

Ҳамюртимиз якунига етган мавсумда Қирғизистон профессионал футбол лигасининг ва Қирғизистон футболининг энг яхши мураббийи деб эътироф этилди. Шунга қарамай, Аҳмедов “Абдиш Ата” билан хайрлашди. Sports.uz журналисти эса Ислом Исмоиловичдан интервью олди.

- Ислом Исмоилович, якунига етган мавсум бўйича сиз Қирғизистон профессионал футбол лигасининг ва Қирғизистон футболининг 2024 йилдаги энг яхши мураббийи бўлганингиз билан табриклайман. Бу сиз учун кутилган жараёнмиди?

- Раҳмат! Ростини айтсам, мен ишлаётганимда бу ҳақида ўйламагандим. Ҳеч бир мураббий бу ҳақида ўйламайди. Албатта, бу ёқимли. Аммо бу тан олиш клуб раҳбарияти, мураббийлар штаби, биринчи навбатда жамоа ва футболчиларни ўзларининг меҳнати натижасидир. Бусиз биз ички чемпионатда ва халқаро майдонда эришган натижамиз имконсиз бўлар эди.

- "Абдиш Ата" клубини икки йил бошқардингиз ва иккала йилда ҳам чемпион қилишга муваффақ бўлдингиз. Олдингизга чемпионлик вазифаси қўйилганмиди?

- “Абдиш Ата” клубида ҳар доим фақат мамлакат чемпиони бўлиш вазифаси қўйилади.

- Гарчи клубни кетма-кет икки йил чемпион қилган бўлсангизда у ердан кетдингиз. Бунинг сабаби нима? Очиғи, истеъфоингизга тушунмадим.

- 2023 йилги мавсумда клубнинг шартлари мамлакатдаги энг яхшиларидан бири эди. 2024 йилги мавсумда премьер-лига иштирокчиларининг барча клублари бир хил бўлди. Стадионлар, ўқув-машғулот базалари қурилди. Молиявий имкониятлар анча яхшиланди. Мен ҳар доим ўша пайтда бўлган шароитларда ишлайман. Раҳбариятга ҳар доим жамоага, мураббийлар штабига, менга ёрдам беришга ва қўллаб-қувватлашга ҳаракат қилганликлари учун раҳмат. Клуб билан меҳнат шартномам тугади. Улар қилган ишлар учун менга миннатдорчилик билдиришди. Жамоа раҳбарияти шартномани узайтириш ёки узайтирмаслик тўғрисида қарор қабул қилади. Улар узайтирмасликка қарор қилишди. Кўринишидан, 2025 йилги мавсум учун бошқа режалари бор.

- Жамоани қандай қилиб кетма-кет икки йил чемпионликка етаклай олдингиз?

- Жамоа яхши футболчилар билан тўлдирилган эди. Мен хоҳлаган ўйин учун жамоа мукаммал ўйнаши керак эди. Футболчиларга ўйинларга тайёргарлик кўриш ва барча расмий учрашувларда, мамлакат чемпионатида, ОФК Кубоги ўйинларида улкан фидойилик, ғояларим ва ёндашувларимни тушунишгани ҳамда қабул қилишгани учун алоҳида миннатдорчилик билдираман. Клуб раҳбариятига ҳамда бизнинг мураббийлар штабимизга ишонч, қўллаб-қувватлаш учун раҳмат. Буларнинг барчаси муваффақиятга олиб келди.

- Қирғизистон чемпионатида энг яхши молиявий бақувват клуб "Абдиш Ата"ми?

- “Абдиш Ата” клуби 2023 йилги мавсумда 10 та жамоадан 4-5 таси молиявий имкониятга эга эди. 2024 йилги мавсумда эса барча клубларнинг молиявий имкониятлари тенглашди. Албатта, молиявий имкониятларга эга ва бизникидан яхшироқ бўлган жамоалар мавжуд. Яна бир савол: бу имкониятларни ким ва қандай бошқаради? Бизнинг клубимиз буни яхшироқ бажарди.

- Олдингизда аниқ таклифлар борми? Кейинги режангиз қандай?

- “Абдиш Ата” футбол клуби раҳбариятининг расмий қарори чиққанидан сўнг менга жуда қизиқарли таклиф келди. Профессионал футбол клубини узоқ муддатли асосда ташкил этишга янги ёндашув. 10 йил давомида мен футбол академиялари раҳбари бўлиб ишладим. Бутун Осиё бўйлаб ФИФА ва ОФК йўналишларида мураббийларни ўқитдим. 2023 ва 2024 йилги икки мавсумда мураббий сифатида фаолият олиб бордим. Бутун иш тажрибамни ҳисобга олган ҳолда менга ушбу лойиҳада иштирок этиш таклиф қилинди. Шартнома имзоланмагунча бу қайси клуб эканлигини айта олмайман.

Шуҳратбек Жўраев.