Илёс Зейтуллаев: "Танаффусда йигитларни кўзига қараб ғалаба қозонишимизга ишонгандим"

Ўзбекистон Кубогининг гуруҳ босқичи 1-туридан ўрин олган "Бунёдкор" - "Бухоро" (1:0) учрашувидан сўнг мезбонлар устози Илёс Зейтуллаев ўз фикрлари билан ўртоқлашди.

"Ҳозир фикрни жамлаб аниқ нимадир айтиш қийин. Боиси, ҳиссиётлар юқори даражада. Айрим вақтларда ўйлаб қоламан, фақат футбол шундай ҳиссиётларни тақдим эта олади. Тўлиқ битта тайм бир киши кам бўлиб ҳаракат қилиш, якунда ғалаба қозониш, йигитлар такрорланмас ишни амалга оширишди. Албатта жуда қийин ғалабадан хурсандман. Зеро, бугунги ғалаба жипслик, бир-бирини қўллаш, катта меҳнат эвазига қўлга киритилди. Мен жамоам билан фахрланаман!

Бугун майдонда ҳаракат қилган барча футболчилар ҳақиқий руҳиятни, характерни кўрсатди. Майдонда неча дақиқа бўлишидан қатъий назар сўнгги сонияларгача кураша олишларини исботлашди.

Майдонда бир киши кам бўлиб қолганимизда ҳам футбол ўйнашга, вазият яратишга ҳаракат қилдик. Бундай ғалабалар меҳнат, сабр ва кўзга кўринмайдиган кўплаб жиҳатлар эвазига қўлга киритилади. Албатта, бугунги ғалаба футболчиларники, қолаверса, атрофимизда меҳнат қилаётган, кўзга кўринмайдиган инсонларники ҳам. Хусусан, академиямиз ошхонасида эрталабдан кечгача хизмат қилаётган ошпазларимизни, бизга майдонларни тайёрлаб бераётган мутахассисларимизни айтиб ўтмасам бўлмайди.

Танаффусда йигитларни кўзига қараб бугунги ўйинда ғалаба қозонишимга ишонган эдим. Шунчаки, улар бунга ишонса кифоя эди. Ишонишди ва буни уддаладик".