Илёс Зейтуллаев "Нефтчи" устидан қозонилган ғалаба ҳақида қандай муносабатда?

"Бунёдкор" матбуот хизмати Суперлиганинг 16-туридан ўрин олган “Нефтчи” - “Бунёдкор” (1:2) учрашувидан сўнг меҳмонлар устози Илёс Зейтуллаев ОАВ ходимларининг саволларига жавоб қайтаргани борасидаги матбуот анжуманини ҳавола қилди.

- Ҳаммага хайрли кеч! Аввало бугун стадионда жуда чиройли муҳитни юзага келтирган ишқибозларга раҳмат айтаман! Ўйин ҳақида гапирадиган бўлсам, “Нефтчи”га қарши осон бўлмаслигини билар эдик ва шунга мос равишда тайёргарлик кўргандик. Албатта ғалаба қозонганимиздан хурсандмиз. Ушбу ғалаба билан барчани табриклайман! 

Давралар оралиғида жамоамизни Одил Ҳамробеков, Луис Качорри, Азизбек Амонов тарк этди. Номлардан маълумки, уларнинг ўрнини тўлдириш осон эмас. Раҳбарият билан келишган ҳолда асосий урғуни ўз академиямизга қаратишни лозим деб топдик. Чунки бизда иқтидорли ёшлар кўп. Тўғри, бу таваккал бўлиши мумкин, аммо ёшлар билан натижага ҳаракат қиламиз.

Мен ҳакамларнинг қаердан эканлигига эътибор қаратмайман. Бугунги учрашувда ҳакамлик яхши савияда кечди, деб айта оламан. Биринчи бўлимдаги қизил карточкали ҳолат, иккинчи бўлимдаги тўп қўлга тегиши бўйича ҳакамлар бошқача қарор қабул қилишди, демак уларга яхшироқ кўринган бўлиши мумкин.

Кучли жамоаларга қарши тайёргарлик қийин кечмайди, футболчилар ҳам ўзларини тайёрлаб борадилар. Энди кейинги турни “Шўртан”га қарши ўтказамиз. Ҳозирдан сезиб турибман, жуда қийин ўйин бўлади.