Илдар Маматказин: "Турон" ёш бўлишига қарамай, бизга қийинчилик туғдирди"

“Андижон” жамоаси сафарда “Турон” майдонида 1:3 ҳисобидаги ғалабани қўлга киритиб ўз ишқибозларига қувонч улашганидан хабарингиз бор.

Мазкур баҳсда ўз ҳисобига гол ёздириб қўйган тажрибали ҳимоячи, жамоа сардори Илдар Маматказин “Андижон” матбуот хизматига ўз фикрлари билан ўртоқлашди.

- Аввало, қўлга киритилган ғалаба билан табриклайман. Учрашув борасида нималарни айта оласиз?

- Катта раҳмат! Учрашувга келадиган бўлсак, биз бу ўйинга яхши тайёргарлик кўрдик, барча эътиборимиз фақат ғалабага қаратилганди. “Турон”ни яхши ўрганиб чиқдик ва ниятимизга эришдик!

- Ўйинда жамоангизнинг иккинчи голини урдингиз ва бу мавсумдаги иккинчи голингизга айланди. Учрашувда аслида гол уриш режангизда бормиди?

- Ҳар бир учрашувда гол уриб, жамоага ёрдам бериш режамда бор. Бу учрашувда омадимиз келди ва ғалаба қозондик. Албатта, мухлисларимизни хурсанд қилганимиздан ўзимиз ҳам хурсандмиз.

- Нима деб ўйлайсиз, рақиб сиз кутгандек қаршилик кўрсатдими ёки...

- Ўйин осон бўлгани йўқ. “Турон” ёш бўлишига қарамай, бизга қийинчилик туғдирди. Улар охиригача курашди. Мухлисларимиз узоқ йўл босиб бизни қўллаб-қувватлаганликлари учун уларга жамоамиз номидан раҳмат айтмоқчиман.

“Андижон” матбуот хизмати.