Ҳусановнинг трансфери ҳайратга солди. Илгари кўзимиз қаёқда эди?!
- 12-январ 2025, 21:36
- Zohir Toshxo’jayev
- 1
- Футбол
Ўзбекистон миллий терма жамоаси марказий ҳимоячиси Абдуқодир Ҳусанов фаолиятини Англиянинг амалдаги чемпиони “Манчестер Сити”да давом эттиришга қарор қилгани 2025 йил бошидаги энг шов-шувли трансфер бўлди.
2023 йилнинг ёзида ўзбек футболчисини 100 минг еврога олган Франциянинг “Ланс” жамоаси бир ярим йилда сарфлаган харажатини 500 баравар қилиб чиқариб олди.
“Манчестер Сити” легионеримизга даъвогарларнинг кўпайиб бораётганини инобатга олиб, “Ланс”га ўйинчини қўйиб юбориш учун 40+10, жами 50 миллион евро таклиф қилди. Аслида лансликлар бу трансфердан узоқ 30 миллион евро кўзлаган эди.
Бир сўз билан айтганда, Абдуқодир “Ланс” тарихида энг қимматбаҳо трансфер соҳибига айланди. Аввалги рекорд Лоис Опендага тегишли бўлиб, 2023 йилнинг ёзида “Лейпциг” ҳужумчи учун “Ланс” ҳисобига 44 миллион евро ўтказиб берганди.
“Ланс”нинг қисқа муддат ичида катта фойда олганига россиялик машҳур мураббий Юрий Сёмин муносабат билдирди.
- Мени Абдуқодир Ҳусановнинг “Манчестер Сити”га трансфери ҳайратга солди. Нега Россия Премьер-лигасида бу футболчини ҳеч ким пайқай олмаган?
Бу футболчи аввал Ўзбекистонда, кейин Беларусда ўйнаган. Наҳотки, Россия клубларининг биронта спорт директори ёнгинамизда порлай бошлаган катта талант эгасини кўра олмаган бўлса!
Мана энди у “Манчестер Сити”га 50 миллион евро эвазига ўтди. Франция клуби қанча маблағ ишлаб олганини тасаввур қилиб кўринг!
“Ланс” эса бу футболчи учун атиги 100 минг евро сарфлаганди. Бу пайт бизнинг клубларимиз қаерда эди? Бу бизнинг мана шу масалаларда ишларимиз жуда зўр эмаслигини кўрсатади, - деди Юрий Сёмин.
Дарҳақиқат, Абдуқодир Ҳусанов футболнинг дастлабки сир-асрорларини “Бунёдкор” академиясида ўрганган. Бироқ профессионал фаолиятини легионер сифатида Беларуснинг “Энергетик-БГУ” клубида бошлади. Бу жамоада бир йил давомида 37 та учрашув ўтказиб, ҳимоядаги вазифаларини уддалашдан ташқари, тўрттадан гол ва ассист муаллифи бўлди.
2023 йилнинг 24 июль куни ёш ҳимоячи Франциянинг ўша пайтдаги вице-чемпиони “Ланс”га бориб қўшилди. Лансликлар таркибида Абдуқодир ҳозиргача 31 та учрашувда иштирок этди ва яқинда биринчи ассистини амалга оширди.
20 ёшли футболчи Ўзбекистон миллий терма жамоаси сафида 18 маротаба майдонга тушган. Энди Абдуқодир юришини Англия майдонларда давом эттиришини интизорлик билан кутамиз.
Ҳусанов трансферидан кейин “Сити” асосий ҳимоячисидан воз кечди!
Ҳусанов ҳали янги клубига бормай туриб, жамоаси бир учрашувда саккизта гол урди
Ҳусанов янги жамоаси билан қанча муддатга шартнома тузиши аниқ бўлди, у “Ланс”машғулотига келмади!