Ҳусановнинг тарафдорлари кўпайиб кетди
- 19-январ, 07:28
- Zohir Toshxo’jayev
- 0
- Футбол
Манчестер дербисида “шаҳарликлар”ни қабул қилган “Юнайтед” кутилмаганда рақиб устидан жуда осон ғалаба қозонди. Мезбонлар “Сити” дарвозасига жавобсиз икки тўп киритди, яна учта гол ўйиндан ташқари ҳолат сабаб бекор қилинди.
Учрашувдан кейин “шаҳарликлар” мухлислари ижтимоий тармоқларда жамоани қаттиқ танқид қилди. Фақат икки футболчи – дарвозабон Жанлуижи Доннарумма ва марказий ҳимоячи Абдуқодир Ҳусановга ижобий муносабат билдиряпти.
Айниқса, ўзбек футболчиси омадсиз кечган ўйинда энг яхшилардан бири бўлди, унинг ўсиши нафақат шу баҳсда, балки бутун мавсум давомида яққол кўзга ташланмоқда.
Кадрлар билан боғлиқ муаммолар (Йошко Гвардиол, Жон Стоунз ва Рубен Диаш жароҳат олган) сабаб Пеп Гвардиола дербида марказий ҳимояда вақт синовидан ўтмаган тандем – 21 ёшли Ҳусанов ва 20 ёшли Макс Аллейнни ўйнатди. Англиялик ҳимоячи ўйинни мутлақо барбод қилди ва танаффусдаёқ алмаштирилди. Абдуқодир эса финал ҳуштагигача майдонда қолди ва ўйиндан кейин “Манчестер Сити” таркибида энг яхшилардан бири сифатида эътироф этилди.
Абдуқодир Ҳусановнинг ўйиндаги кўрсаткичлари қуйидагича кўриниш олди:
Паслар (аниқлиги): 76/81 та (94%)
Тўпни олиб қўйиш: 2 та
Тўпни узоқлаштириш: 9 та
Тўпни бош билан узоқлаштириш: 3 та
Тўпни йўлдан олиб қолиш: 3 та
Тўпни қайтариб олиш: 3 та
Бу кўрсаткичларнинг аксариятида Ҳусанов “Сити” таркибида энг яхши натижани қайд этди.
Шунингдек, Абдуқодир Ҳусанов 3 марта тўпни жамоасига қайтариб олиб берди. У тўп билан ҳам жуда фаол ҳаракат қилди:
- 98 та тўпга тегиниш (фақат Родри ундан кўп),
- 81 та узатма (иккала жамоа ўйинчилари орасида 2-ўрин),
- 94% аниқлик — бу кўрсаткичларда ҳам фақат Родри ундан олдинда бўлди.
Бунақа натижалар билан Ҳусанов жамоанинг бошқа ҳимоячилари фонида яққол ажралиб турди ва Доннарумма билан бирга энг ишончли футболчи сифатида тан олинди.
Ўйиндан кейин “Сити” мухлислари ижтимоий тармоқларда қуйидаги фикрларни билдирди.
Sadhorse:
Агар Доннарумма ва Ҳусанов бўлмаганида, ҳисоб 5:0 кўринишига келарди.
Drinkandrant:
Ҳусанов — бизнинг янги Серхио Рамосимиз. Унга алоҳида раҳмат.
ThiagollPo:
Ҳусанов ва Жижи бу ўйиндан қолган ягона яхши хотира. Аллейн ва Льюис трансферга қўйилиши керак, Холанд ва Фоден — захирага.
Hamxamcfc:
Фоденга ҳам, Родрига ҳам лаънат. Рико Льюис ҳам шу ерда қолсин. Семеньо, Аке, Доку, Бернарду — ҳаммаси кетсин. “Манчестер Сити”га шарманда.
Биз мухлислар Доннаруммани яхши кўрамиз ва албатта, сени ҳам Ҳусанов.
DjallenDs:
Энг минимал талаб — максимал ҳаракат қилиш. Биз эса яккама-якка курашларда ҳам ютмадик. Бугун “Манчестер Юнайтед” ғалаба қозонишни кўпроқ истади. Фақат дарвозабон ва Ҳусанов яхши кўринди, қолганлари — мутлақ шармандалик.
The_lawyerguy:
Бу ўйиндан кейинги ягона фикр: Ҳусанов захирада ўтириши керак эмас. У Марк Гехи билан яхши жуфтлик ҳосил қилишига умид қиламиз.
Шу каби изоҳлар жуда кўп. “Сити” мухлислари ўзбек ҳимоячисининг таркибга тез-тез киришини истамоқда, чунки бошқа ўйинчиларнинг даражаси уларни қониқтирмаяпти. Ҳусанов эса сўнгги бир йилда жуда катта ўсишга эришди ва фақат мухлислар қўллаб-қувватлаши туфайли эмас, балки ўйини билан ҳам кўпроқ майдонга тушишга лойиқ.