Ҳусановнинг рейтинги “учди”
- 7-январ, 00:22
- Zohir Toshxo’jayev
- 0
- Футбол
Трансферларга ихтисослашган нуфузли Transfermarkt портали постсовет ҳудудидан етишиб чиққан ва 2025 йилда энг кўп қимматлашган футболчилар рейтингини эълон қилди.
Ушбу рейтингда Ўзбекистон миллий терма жамоаси ва “Манчестер Сити” ҳимоячиси Абдуқодир Ҳусанов бошчилик қилди. Унинг трансфер қиймати ўтган йили рекорд даражада қимматлаб, трансфер қийматига 23 миллион евро қўшилди.
Айни пайтда 21 ёшли футболчининг умумий трансфер нархи 35 миллион еврони ташкил қилмоқда. Бу кўрсаткич бўйича Абдуқодир Марказий Осиёда энг қимматбаҳо футболчи сифатида эътироф этилган.
га ошди ва ҳозирда футболчининг баҳоси 35 миллион еврони ташкил этмоқда.
Transfermarkt янги рейтингининг иккинчи поғонасидан Россия миллий терма жамоаси ярим ҳимоячиси Матвей Кисляк жой олди. Аббосбек Файзуллаев билан ЦСКАда бирга ўйнаган футболчи бир йил ичида 18,8 миллион еврога қимматлашиб, ҳозир 20 миллион евро қийматга эга.
Қимматлашган ўйинчилар рейтингида кучли учликни яна бир россиялик чарм тўп устаси – “Локомотив” клуби ярим ҳимоячиси Алексей Батраков якунлади. Унинг қиймати 17 миллион еврога ўсиб, ҳозир 25 миллион евро этиб белгиланган.
Рейтингнинг кучли ўнлиги қуйидаги кўринишга эга:
Абдуқодир Ҳусанов (“Манчестер Сити”) — €35 млн (+€23 млн)
Матвей Кисляк (ЦСКА) — €20 млн (+€18,8 млн)
Алексей Батраков (“Локомотив”) — €25 млн (+€17 млн)
Егор Ярмолюк (“Брентфорд”) — €25 млн (+€13 млн)
Илья Забарний (“Борнмут”) — €50 млн (+€12 млн)
Жорж Микаутадзе (“Вильярреал”) — €28 млн (+€10 млн)
Данил Глебов (ЦСКА) — €8 млн (+€7,3 млн)
Станислав Агкацев (“Краснодар”) — €10 млн (+€6,5 млн)
Арсений Батагов (“Трабзонспор”) — €9 млн (+€6,2 млн)
Олег Очеретько (“Шахтёр” Донецк) — €6 млн (+€5,2 млн)
Эслатиб ўтамиз, Абдуқодир Ҳусановнинг нархи кескин кўтарилиши иқтидорли футболчининг “Манчестер Сити”га кўчиб ўтиши билан боғлиқ. 2025 йилнинг 20 январь куни “шаҳарликлар” ўзбек ҳимоячисини Франциянинг “Ланс” клубидан трансфер қилиш учун 40 миллион евро бадал пули тўлаган. Ўшанда Абдуқодирнинг трансфер қиймати 12 миллион еврони ташкил этган эди.