Ҳусановнинг Гвардиолани ҳайратга солган учта сифати айтилди!
- 24-январ 2025, 20:09
- Zohir Toshxo’jayev
- 4
- Футбол
Абдуқодир Ҳусанов Англия Премьер-лигаси клуби билан узоқ муддатли расмий шартнома тузган биринчи ва ягона ўзбек футболчиси сифатида ўз номини тарихга ёздириб қўйди.
Ўз юртида профессионал даражада бирорта учрашувда майдонга тушмаган ўзбекистонлик футболчининг қисқа муддатда дунёнинг энг қудратли клубларидан бирига ўтишини ҳақиқий саргузаштга қиёслай мумкин.
Тасаввур қилинг, 2022 йили Беларусь чемпионатида илк профессионал битимини имзолаган Ҳусанов бир йилдан кейин Франциянинг ўша пайтдаги вице-чемпиони “Ланс”га кўчиб ўтганди. Европанинг “Топ-5” лигасидаги фаолиятини бошлаганидан бир ярим йил ўтиб, легионеримиз Англиянинг амалдаги чемпиони сафига қўшилди.
Абдуқодир Ҳусановни Европанинг йигирмага яқин клуби чангалидан юлиб олган “Манчестер Сити” клуби бош мураббийи Хосеп Гвардиолани ўзбек ўйинчисининг қайси хусусиятлари қизиқтириб қўйган эди?
Европа футболи экспертлари 20 ёшли ҳимоячининг “Ланс” клуби ва Ўзбекистоннинг ёшлар ва миллий терма жамоаларидаги ўйинларини таҳлил қилиб, “Манчестер Сити” устозининг эътиборини қозонган футболчимизнинг бошқаларга нисбатан учта кучли жиҳатини аниқлашди.
Динамика ва шиддат: Абдуқодир Ҳусанов тўпни олиб қолиш ва тўхтатиб қолиш каби муҳим ҳимоявий кўрсаткичларни юқори даражада уддалаши билан ажралиб туради. Бу кўрсаткичлар бўйича у Франция чемпионатининг энг зўр ҳимоячилари рейтингида пешқадамлардан бири бўлган.
Кўпфункциявийлик: Бу терминни серқирралик, универсаллик каби бошқа атамалар билан ҳам турлича номлаш мумкин. Ҳусановнинг асосий амплуаси марказий ҳимоячи бўлишига қарамай, турли ҳимоявий схемаларга мослаша олади, орқа чизиқнинг исталган нуқтасида, ҳатто ҳар икки қанотда ҳам ўйнай олади. Бундан ташқари, 20 ёшли футболчи зарур вазиятда таянч ярим ҳимоячиси вазифасини ҳам уддалайди. Универсаллик бош мураббий Хосеп Гвардиола алоҳида қадрлайдиган хусусиятлардан ҳисобланади.
Ўсиш салоҳияти: Абдуқодирнинг айни пайтда ҳаммани ҳайратга солаётган мавқеи бу энг юқори даража эмас. Ҳимоячи сифатида ҳимояланишнинг кўплаб кўникмаларини ўзлаштирган футболчимиз маҳоратини янада ошириш салоҳиятига эга. “Манчестер Сити” мураббийлари ўзбекистонлик легионернинг янги қирраларини очиши кутиляпти.
Бундан ташқари, Ҳусанов ёш бўлишига қарамай, хотиржам ва совуққонлик билан ҳаракат қилиши, яккакурашлардан қочмаслиги, тезлиги жуда юқори экани, ҳужум ва қарши ҳужумларни бошлаш маҳорати, ўйинни ўқиш қобилияти жуда яхши шакллангани ҳам эътироф этилмоқда.
Экспертлар “Манчестер Сити”нинг ўйин услуби “Ланс”никидан фарқ қилиши, “шаҳарликлар” тўпни тўлиқ назорат қилиш орқали ўйин ташкил этишини инобатга олиб, айнан мана шу жиҳат Абдуқодир Ҳусановдан талаб қилинишини ҳам таъкидлаб ўтди.
Энг муҳими эса, Ҳусанов Хосеп Гвардиоладек жаҳон футболида ҳам ўйинчи, ҳам мураббий сифатида чуқур из қолдирган инсондан сабоқ олиш имконига эга бўлди. Қолаверса, энди замонавий футбол ватани Англияда ҳам Абдуқодир Ҳусанов тимсолида ўзбек футболчиларининг нималарга қодирлигини билиб олишади.