Ҳусановни янги мавсумда нималар кутяпти?

Франция чемпионатида юқори ўринлар учун курашиши кутилаётган “Ланс” янги мавсумга жиддий тайёргарлик кўрмоқда. Бироқ “Ланс” даражасидаги клубларга етакчи ўйинчиларини сақлаб қолиш ҳар доим қийин бўлган.

Ўтган йили клубни Лои Опенда тарк этди ва “Лейпциг” сафида Бундеслиганинг энг яхши тўпурарлари қаторига қўшилди. Энди лансликларни тарк этиш навбати марказий ҳимоячи Кевин Дансога келган. Унга Англия ва Италия клубларидан яхши таклифлар бор.

“Ланс” фаолиятини ёритиб келаётган  lensois.com сайти клуб мухлисларига “Кевин Дансонинг ҳимоядаги етакчилигини Абдуқодир Ҳусановга юклаш керакми?”, деган савол билан мурожаат қилди.

Францияликлар мухлислар бу саволга ўз жавобини бермоқда. Қисқа фурсат ичида 30 нафардан ортиқ футбол ишқибозлари Абдуқодир Ҳусанов бўйича фикрини билдирган.

Sports.uz портали анашу жавоблардан айримларини ўзбекистонлик футбол ишқибозлари эътиборига ҳавола  этади.

Polo5906:

Ҳусанов ҳимоянинг ҳар учала нуқтасида ҳам ишончли ўйнаб келаётганини ўтган мавсум давомида кўрдик. Янги мавсум бошланиши билан унинг рейтинги кескин ошади.

Riko21:

Абдуқодир Кевин Дансога биринчи рақамли ўринбосар. Мантиқан ҳам танлов айнан Ҳусановда тўхташи керак. Бу легионер жамоага келганидан бери беллашувларда курашмоқда, билмаганларини ўрганяпти, доим чақирувга тайёр.

У жуда кам ўйнади, лекин шунда ҳам жамоадошлари билан яхши чиқиша олишини, вазиятларни тўғри баҳолашини кўрсатди.

Табиийки, ҳаммаси ҳам ҳар доим идеал даражада бўлавермайди. Диққатини йўқотган, вазиятни бой берган, рақибга алданиб қолган ҳолатлар ҳам бўлди. Лекин унинг салоҳияти бу каби камчиликларни йўқотишга етади ва ўсиш учун мунтазам ўйнаши керак.

Ҳусановнинг ёшидаги ўзбек Беларусь чемпионатидан келиб, қисқа фурсатда янги жамоасига тўлиқ мослашди. Бу унинг қатъиятли эканини кўрсатади. Биз мухлисларга Абдуқодирнинг айнан қатъиятли йигит экани кўпроқ ёқади.

Seb62:

Менда озгина ҳадиксираш бўлса ҳам, Ҳусановга имкон бериш керак, деб ҳисоблайман. Биринчидан, бу легионер бош билан ўйнаш сифатини ошириши лозим. Иккинчидан, жуда шиддатли ўйнайди. Унинг шиддатини тўғри йўналтириш талаб этилади. Лекин 20 ёшда жамоа ҳимоя чизиғини бошқариш осон бўлмайди.

Шунга қарамай, Ҳусанов жуда зўр футболчи. Хато ҳаммада ҳам бўлади. Лекин сохта мухлислар унинг биринчи хатоси туфайли босим қилмаса бўлди.

Bonaparte:

Ҳусанов ўтган мавсумда бир неча марта хатога йўл қўйди, дарвозамизга пенальти келтирди. 20 ёшида уни ҳимоя чизиғи етакчиси қилиш нотўғри бўлса керак...

Mzt:

Қариб қолаётган Жонатан Градит ўрнига ўйнасин.

FD:

Бир йилдан бери жамоада ўйнаб келяптими, демак унга ишонч билдирадиган вақт келди. Ҳа, у хатоларга йўл қўйди. Бунақаси Фекундо Медина, Кевин Дансо ва Бадеда ҳам бўлган.

Лекин Ҳусановга имкон берадиган вақт келди. Бир мавсум мунтазам асосий таркибда ўйнаши вазиятни яхши томонга ўзгартиради.

Pierrot:

Ҳусановни ҳимоя чизиғи етакчилигини топшириш фикрига 200 фоиз қўшиламан. У ёш, жуда салоҳиятли ўйинчи. Ҳар доим хатоларни тузатиб келаганини ҳам инобатга олиш керак. Бу ўйинчи келажак учун сармоя. У ўз вазифаларини мукаммал уддалай олиши шарт.

Эслатиб ўтамиз, Абдуқодир Ҳусанов ўтган мавсумда “Ланс” сафида Франция чемпионатида 11 маротаба майдонга тушди. Шунингдек, УЕФАнинг энг нуфузли мусобақалари – Чимпионлар лигаси ва Европа Лигасида иккитадан беллашувда қатнашди.

Франция олий дивизионининг янгимавсуми 18 августдан бошланади. “Ланс” футболчилари илк учрашувини Лига 1 дебютанти “Анже” майдонида ўтказади.  

Бизга Ҳусанов керак! Легионеримиз фаолиятида яхши ўзгариш бўлади