Ҳусановни Англия грандлари сафида кўрамизми? Жараён бошланди...

“Ланс”да порлаётган Абдуқодир Ҳусановга гранд клублардан биринчи бўлиб ПСЖ эътибор қаратган эди. Париж клуби мутасаддилари 20 ёшли легионерни бир неча ҳафтадан бери мунтазам кузатиб келмоқда.

Бироқ бир неча манбалар Ўзбекистон миллий терма жамоаси марказий ҳимоячиси учун курашда Европанинг бошқа катта клубларининг имкониятини парижликларникидан юқори баҳоламоқда.

Sports.uz портали айрим нуфузли манбалар ва таниқли экспертларнинг Абдуқодир Ҳусанов трансфери бўйича бераётган энг охириги маълумотларини ўзбекистонлик футбол ишқибозлари эътиборига ҳавола этади.

Бастьен Обер, butfootballclub.fr портали эксперти:

ПСЖ ва “Ланс” ўйинининг 60-дақиқасида майдондан четлатилган Абдуқодир Ҳусановни Англиянинг икки йирик клуби синчковлик билан кузатиб келмоқда.

Қишки трансферлар  мавсуми яқинлашгани сари “Ланс” ўзининг 20 ёшли ҳимоячисига жорий чемпионатда қаттиқ суяниб қолганига қарамай, уни трансфер қилишга ҳаракатлар кучайиб, кўпайиб бораверади.

Лондоннинг икки жамоаси – “Челси” ва “Тоттенхэм” Франция чемпионати вакили “Ланс”дан Абдуқодир Ҳусановнинг трансфери бўйича тегишли маълумотларни сўраган ва ўз сўровларига жавоб кутмоқда.

Ўзбек футболчисини нишонда ушлаб турган клублар қаторида Франциянинг амалдаги чемпиони ПСЖ ҳам бор. Бироқ Лондон клублари уни парижликларга қолдирмоқчи эмас.

Кевин Дансо, “Ланс” футболчиси:

- Абдуқодир Ҳусанов – буюк ўйинчи, ҳамма буни кўрди. Мен буни ўтган мавсумдан бери яхши биламан.

Агар у Европанинг энг машҳур клубларидан келганида, унинг трансфери 100 миллион еврога тушган бўларди.

Клеман Валес,  dailymercato.com сайти эксперти:

Франция чемпионатининг ҳақиқий кашфиётига айланган Абдуқодир Ҳусановнинг трансфер бозоридаги рейтинги ошиб бормоқда.

“Челси” ва “Тоттенхэм” лансликлардан трансфер маълумотларини сўраган. “Ланс”  Лига 1 ўйинларида кетма-кет икки бор мағлубиятга учраган бўлса-да, ҳамон чемпионатнинг ҳимояси энг мустаҳкам жамоаси бўлиб турибди. Бунда дарвозабон Брис Самба билан Абдуқодир Ҳусановнинг ҳиссаси катта.

Ҳусанов кетма-кет икки ой “Ланс”нинг энг яхши ўйинчиси бўлганди. Энди Франция чемпионатида октябрь ойининг энг яхши ёш ўйинчиси, деб эътироф этилди.

Ўзбек ҳимоячиси бу номинацияда “Марсель”нинг англиялик ҳужумчиси Жонатан Роу ва “Лион”нинг бельгиялик ярим ҳимоячиси Малик Фофанани ортда қолдирди. Бу сўровномада Ҳусанов 46,9 фоиз овоз олиб, таъқибчилари катта фарқ билан ортда қолдирди. Хусусан, Роуга 28,2, Фофанага 24,9 фоиз респондент овоз берган.

Бундан ташқари,  Sofascore портали ўзбек футболчисини 21 ёшгача бўлган дунёнинг энг яхши футболчилари рўйхатига ҳам киритди.

Бу футболчини 20 ёшгача футболчилар ўртасида ўтказилган Осиё кубоги мусобақасида Батист Фавье кашф қилган. Унинг трансфери “Ланс”га 100 минг еврога тушган.

Эслатиб ўтамиз, Абдуқодир Ҳусанов футболнинг дастлабки сир-асрорларини “Бунёдкор” тизимида ўрганган. Кейинчалик Беларусь чемпионатида “Энергетик-БГУ” жамоасида профессионал фаолиятини бошлади. 2023 йилнинг ёзидан “Ланс” футболчиси ҳисобланади.

Уни оламизми? ПСЖ юлдузларини “тўкиб ташлаган” Ҳусановга Париж клубининг муносабати қандай?

Легионеримиз Россия терма жамоасига маслаҳат берди

Файзуллаев билан дўстликни тўхтатамиз!