Ҳусановга яхши хабар!
- 7-июн 2024, 07:30
- Zohir Toshxo’jayev
- 0
- Футбол
Абдуқодир Ҳусанов Европа чемпионатларида ўйнаётган энг иқтидорли 21 ёшгача бўлган футболчилар рейтингида кучли юзликдан жой олди.
Италия оммавий ахборот воситалари, хусусан, Tuttosport 21 ёшгача бўлган футболчиларга бериладиган “Golden Boy” совринига бу гал даъвогарлик қилаётган юз нафар футболчини эълон қилди.
Ушбу рўйхатдан “Ланс”нинг 20 ёшли ўзбекистонлик ҳимоячиси Абдуқодир Ҳусанов ҳам жой олди.
Марказий ҳимоячи позицияда ўйнаб келаётган легионеримиз якунланган мавсумда Франция чемпионати, УЕФА Чемпионлар лигаси ва Европа лигасида умумий ҳисобда 16 та учрашувда иштирок этди.
Ҳусанов “Golden Boy - 2024” танловида ҳозирча 87-поғонада бормоқда.
Жорий мавсумда ушбу танлов ғолиблигига даъвогарлар орасида “Барселона” юлдузи Ламин Ямал, “Бенфика”дан Жоау Невеш, “Манчестер Юнайтед”дан Алехандро Гарначо, “Лилль”дан Лени Йоро ва ПСЖдан Уоррен Заир-Эмери каби таниқли ўйинчилар бор.
“Ланс” мухлислари Абдуқодир Ҳусановнинг “Golden Boy - 2024” совринига даъвогарлар рўйхатига киритилганига қуйидагича муносабат билдирди.
Teitur62:
Бу йил Абдуқодир Ҳусанов учун янги чемпионатга кўникиш даври бўлди. Бундан буён марказий ҳимоячи мунтазам ўйин амалиётига эга бўлиши керак.
Syl1362:
Бош мураббий Франк Хейз Абдуқодирни нега етарли даражада ўйнамаётанига тушунганим йўқ.
Seb62:
Ҳусанов келажаги порлоқ ўйинчи, лекин уни ҳозирги етакчилар билан таққослаббўлмайди. У шиддатли ўйнайди, тажрибасизлиги туфайли баъзан хатога ҳам йўл қўймоқда.
Жамоамизга Рафаэль Варан келиб, Ҳусановга устозлик қилса яхши бўларди.
Olivier 6:
Агар ўтган йилги трансфер сиёсатига эътибор берсак жамоага Нил Ал-Айнауи ва Абдуқодир Ҳусанов сингари ҳеч ким танимайдиган ўйинчилар келди. Бу трансферлардан қониқиш ҳосил қилсак бўлади.
Bass62:
Бу танлов ақл билан қилинган. Ҳозир 20 ёшли Ҳусановдан ўйинчидан тажрибали футболчилар даражасини талаб қилиб бўлмайди.
Эслатиб ўтамиз, “Ланс” Абдуқодир Ҳусановнинг трансфери учун Беларусь чемпионати вакили “Энергетик-БГУ”га 100 минг евро тўлаган эди. Трансферларга ихтисослашган transfermarkt.world порталида куни кеча янгиланган маълумотларга кўра, легионеримизнинг трансфер суммаси 2,5 миллион еврога кўтарилди.