Ҳусанов хотиржам бўл, ўрнингга келадиган ўйинчининг йўли ёпилди
- 29-октябр 2025, 06:35
- Zohir Toshxo’jayev
- 0
- Футбол
Ўзбекистон миллий терма жамоаси ҳимоячиси Абдуқодир Ҳусанов клублар миқёсида “Манчестер Сити” шарафини ҳимоя қилаётгани боис, sports.uz портали ушбу клубга оид янгилик, хабар ва маълумотларни ўқувчилар эътиборига ҳавола қилади.
“Манчестер Сити” 20 январда жамоага “Ланс”дан Абдуқодир Ҳусановни олиб келиш билан авлодлар алмашинуви жараёнига старт берган эди. Ҳозирга қадар, иккита трансфер ойнаси даврида янгиланиши талаб этилган деярли барча нуқталарга янги ижрочилар келди.
Энг катта муаммо эса, ўнг қанот ҳимояси бўлиб қолди. Бу позицияни эгаллаши кутилган Рико Льюис ва Матеуш нуньеш ҳимояланиш масаласида Кайл Уокернинг ўрнини боса олмади. Жорий мавсум бошида бу камчилик жамоанинг икки марта мағлубиятга учрашига олиб келди. Оқибатда, Хосеп Гвардиола асли марказий ҳимоячи бўлган Абдуқодир Ҳусановни ўнг қанотга қўйди.
21 ёшли легионеримиз жароҳат олгунича, ўта мураккаб учрашувларда ҳам жамоанинг энг нозик нуқтасини муваффақиятли ёпиб келди. Ҳусанов жароҳатдан фориқ пайтда ўнг қанот ҳимоясида ўйнаш учун биринчи рақамли номзод ҳисобланади. Унинг ҳимояланиш қобилияти Льюис ва Нуньешникида анча кучли.
“Шаҳарликлар” ўнг қанот ҳимоячисига янги ўйинчи масаласини ортга сурмоқда. Бу кўп жиҳатдан Абдуқодир Ҳусанов сафга қайтганидан кейин қай даражада ўйнашига боғлиқ масала ҳисобланади.
Хосеп Гвардиола нишонида “Ньюкасл” ўнг қанот ҳимоячиси Тино Ливраменто турибди.
Сўнгги маълумотларга қараганда, манчестерликларга бу ўйинчини олиш осон бўлмайди. “Ньюкасл” яқинда спорт директорлигига Росс Уилсонни тайинлади. Янги раҳбар олдида турган энг долзарб масала – жамоанинг икки етакчиси Свен Ботман ва Тино Ливраменто билан янги шартнома тузиш ҳисобланади.
Ботманинг амалдаги битими 2027 йилнинг ёзигача давом этиши белгиланган. Ливраменто эса, 2028 йилнинг ёзигача “қарғалар” жамоасида тўп тепиши белгиланган. Агар Росс Уолсин бу ўйинчиларни янги келишувга кўндира олса, ўз-ўзидан уларнинг бошқа жамоага ўтиш йўллари ёпилади. Амалда “Манчестер Сити” ҳам ўзи кутаётган англиялик ҳимоячини қўлга кирита олмайди.
Гвардиола “Барса” етакчисини оладиган бўлди
“Манчестер Сити”да авлодлар алмашинуви амалга ошираётган бош мураббий Хосеп Гвардиола таркибни мунтазам кучайтириб бориш учун янги ижрочиларни қидиришни тўхтатгани йўқ.
“Шаҳарликлар” ёзги трансферлар даврида “Барселона”нинг етакчи ҳимоячиларидан Алехандро Бальдени жамоага қўшиб олишни режалаштирган.
E-Notícies нашрининг таъкидлашича, 22 ёшли испан футболчисига Хосеп Гвардиоланинг шахсан ўзи жиддий қизиқиш билдирмоқда ва уни олиш бўйича каталонияликлар спорт директори Деку билан суҳбат ҳам ўтказди.
2023 йили “шаҳарликлар” Каталония клубининг молиявий аҳволидан фойдаланиб, Бальдени трансфер қилишга уриниб кўрган эди. Ўшанда “Барселона” ўз футболчисини Англияга жўнатмаган эди.
Трансферлар бўйича экспертларнинг таъкидлашича, айни пайтда каталонияликлар моляивий аҳволини барқарорлаштириб олган ва жамоада асосий фигуралардан ҳисобланган Алехандро Бальдени қўйиб юбориш эҳтимоли жуда паст.
21 ёшли чап қанот ҳимоячининг “Барселона” билан амалдаги шартномаси 2028 йилнинг ёзигача давом этиши белгиланган. Бальде Transfermarkt портали томонидан 60 миллион еврога баҳоланмоқда.
Гвардиола зўр футболчини тўрт гранд билан талашмоқда
Италия чемпионатида “Ювентус” таркибида порлаётган туркиялик Кенан Йилдиз олдиндаги трансфер ойналари давомида барчанинг диққат-марказида бўладиган кўринади.
20 ёшли ҳужумкор футболчини ҳозирнинг ўзида камида бешта гранд клуб ўз сафига қўшиб олишга тайёргарлик кўрмоқда.
Таниқли инсайдер экрем Конурнинг маълум қилишича, Кенаннинг атрофидаги вазиятни Англия Премьер-лигасининг тўрт бадавлат клуби – “Манчестер Сити”, “Манчестер Юнайтед”, “Челси” ва “Арсенал”, Испаниядан “Реал” синчковлик билан кузатиб келмоқда.
Турин суперклуби раҳбарияти эса, ўйинчини маошини ошириш орқали янги шартномага кўндиришга ҳаракат қиляпти.
Кенан аслида Германияда туғилган ва “Бавария” академияси тарбияланувчиси ҳисобланади. Иқтидорли футболчи 2022 йили Италияга кўчиб ўтиб, эркин агент мақомида “Ювентус” ёшлар жамоасига қўшилган.
“Ювентус” Кенан Йилдизни 2023 йилнинг ёзида асосий таркибга қабул қилди. Универсал ҳужумчи ҳисобланган турк футболчисининг бугунги кундаги трансфер нархи 75 миллион еврога етди. Унинг амалдаги шартномаси 2029 йилнинг ёзигача тузилган.