Ҳусанов бошқа жамоага ўтиб кетади!
- 31-август 2024, 17:55
- Zohir Toshxo’jayev
- 0
- Футбол
Абдуқодир Ҳусанов бир йил муқаддам “Ланс” жамоаси сафига қўшилганидан бери УЕФАнинг барча нуфузли мусобақаларида иштирок этиб улгурди.
20 ёшли ҳимоячимиз ўтган мавсумда Чемпионлар лигаси ва Европа лигасида иккитадан учрашувда майдонга тушганди. Бу мавсум Абдуқодир “кўхна қитъа”нинг учинчи нуфузли халқаро турнири Конференциялар лигасида тўп тепди.
Конференциялар лигасининг гуруҳ босқичига чиқиш учун ўтказилган плей-офф ўйинларида лансликлар Грециянинг “Панатинаикос” жамоасига рўбаро бўлди. Франциядаги илк учрашувда мезбонлар 2:1 ҳисобида ғалаба қозонган эди.
Жавоб ўйини олдидан Уилл Стилл таркиб танлашда қийинчиликка дуч келди. Шу пайтга қадар “Ланс”нинг ҳимоя учлигини ташкил қилиб келган уч нафар футболчидан иккитаси ўйиндан чиқди. Факундо Медина биринчи баҳсда қизил карточка олгани учун дисквалификацияни ўтади. Ҳимоя чизиғи етакчиси Кевин Дансо жавоб ўйини ўрнига “Рома” учун тиббий кўрикдан ўтиш мақсадида Италия пойтахтига жўнаб кетди.
“Ланс” мураббийлари, раҳбарияти ва мухлисларини Дансонинг ўрнини қайси футболчи боса олиши қизиқтирарди. Бу ишни Абдуқодир Ҳусанов уддалади. Гарчи “Ланс” Афинада 0:2 ҳисобида енгилган бўлса-да, ўзбекистонлик легионер “Ланс” таркибида энг яхши ўйинчи бўлди.
“Ланс” фаолиятини ёритиб келаётган lensois.com портали анъанага кўра, учрашувда лансликларнинг энг яхши ўйинчисини аниқлаш учун сўров ташкил қилди.
Натижалар қуйидагича бўлди:
Ҳусанов: 42,27%
Диуф: 26,36%
Томассон: 18,95%
Бошқалар: 2 фоиздан кам...
LENSOIS.COM шарҳи:
Кутилганидек, Абдуқодир Ҳусанов ҳимоя марказида Кевин Дансонинг ўрнини эгаллади. Мағлубиятга қарамай, ўзбек футболчиси аниқ ва бехато ҳаракатлари билан ажралиб турди. Учрашувни яхши бошлаган Энди Диуф майдон марказини яхши ушлаб турди, бироқ танаффусдан кейин ўйинида пасайиш кузатилди.
Шунингдек, “Ланс” мухлислари ҳам футболчилар ўйини бўйича ўз фикр-мулоҳазаларини билдириб ўтди.
Syl1362:
Абуқодир Ҳусанов ва Маланг Саррдан кўп нарса кутилган эди. Улар ўзларига юклатилган вазифани яхши уддалади. Сотока пенальтини бажара олмагани ёмон бўлди, Гратид рақиб ҳужумчиларини ўтказиб юборди, Хайдарани нега ҳалигача майдонга туширишаётганини тушунмадик.
Teitur62:
Ҳусанов масаласида ҳеч қандай шубҳа йўқ эди, у Дансонинг йўқлигини билдирмади. Бу футболчи энди захирада ўтиришга кўнмайди. Абдуқодирнинг салоҳиятини инобатга олганда тез орада бошқа жамоага ўтиб кетади.
Tibo1307:
Мен ҳам юқоридаги фикрга қўшиламан. Грециядаги ўйиндан Ҳусанов Европада ҳам зўр ўйин кўрсата олишини намойиш қилди. Ҳимояни зўр ушлади, рақиб футболчиси Фотис Ионнидисга ўйин бермади. Дансонинг қайтиши Абдуқодирни яна захира ўриндиғига қайтаради. Балки Факундо Медина ёки Жонатан Градитнинг ўрнини тўлиқ унга бериш керакдир. Ҳусановни қўлдан чиқармаслик керак. Бу келажаги порлоқ ўйинчи.
Таъкидлаш жоизки, Абдуқодир Ҳусанов ёш бўлишига қарамай, ҳар қандай мусобақа ва учрашувларда асосий таркибда ўйнашга қодирлигини яна бир карра исботлаб бўлди. Энди мураббийлар штаби унги етарли даражада ўйин амалиёти беришидан умид қиламиз.