"Ҳамма ўз ишига профессионаллик билан ёндашиши лозим", "ўзбек футболига испан ҳавоси олиб киришни ният қилганмиз" ёхуд Бобур Акбаров "Сурхон"нинг мақсадлари ҳақида гапирди (интервью)

SPORTS.uz сайтида янги лойиҳа! Энди "Етакчи" лойиҳаси орқали Суперлигамиз жамоаларининг етакчилари билан интервью уюштирамиз. Бизнинг навбатдаги суҳбатдошимиз "Сурхон" клуби етакчиси Бобур Акбаров.

Жамоанинг ички муҳити ҳақида гапириб ўтсангиз.

Кўз тегмасин, жамоада ички муҳит аъло даражада. Бу борада ҳеч қандай гап-сўз бўлиши мумкин эмас. Испаниялик мураббий футболчиларни аҳил оилага айлантира олди. Ўз навбатида, биз ҳам унга қўлимиздан келганча ёрдам бердик. Бизга фақатгина ғалаба етишмаётган эди. Кубок доирасида "Бухоро"ни мағлуб этиб, бунга ҳам эришдик. Кейинги беллашувларда ҳам максимал даражада ҳаракат қиламиз.

Хорижлик мураббийнинг ўйин услубига мослашиш қийинчилик туғдирмаяптими?

- Тўғрисини айтсам, шахсан мен учун бу муаммо туғдирмайди. Сабаби, легионер сифатида ҳаракат қилганимда бразилиялик мутахассис қўл остида ўйнаганман. Умуман олганда, маҳаллий бўлмаган мураббий билан шуғулланиш ўзгача тажриба ҳисобланади. Одатда, улар шогирдларидан ҳамма нарсани максимал талаб қилади. 

Жамоанинг чемпионатдаги мақсади қандай?

- Худо хоҳласа, юқори поғоналар учун кураш олиб борамиз. Бундай мураббий ҳамма жамоага ҳам келавермайди. Шунинг учун, имкониятдан унумли фойдаланишимиз лозим. Мураббийнинг тактикаси ва бизнинг ўйинимиз билан ўзбек футболига испан ҳавосини олиб киришни ният қилганмиз. Барчасини майдонда исботлаймиз. 

Жамоа ўз майдонида ўйнамаётгани натижага ўз таъсирини кўрсатмаяптими?

- Клубдаги ҳар бир инсон ўз ишига профессионал тарзда ёндашиши лозим. Ҳозирча, ўйинларни Самарқандда ўтказилиши қийинчилик туғдирмаяпти. Биз - профессионаллармиз! Шунинг учун қаерда ўйнашимиздан қатъи назар, боримизни бериб, "Сурхон" ғалабалари учун максимал ҳаракат қиламиз.

Фазлиддин Абдураҳмонов суҳбатлашди