Ҳакамларимиз халқаро майдонда

Жорий йилги футбол мавсумида ҳам ўзбекистонлик реферилар халқаро турнирлар ва учрашувларда фаолият юритишмоқда.

Аскер Нажафалиев 2025 йилги U-20 Осиё Кубогининг Иордания – Ироқ, Таиланд – Корея Республикаси ва Саудия Арабистони – Корея Республикаси (ярим финал) учрашувларида бош ҳакам, Австралия – Саудия Арабистони (финал) учрашувида эса ВАР ҳаками ассистенти сифатида фаолият юритди. Руслан Серазетдинов эса ёрдамчи ҳакам вазифасини бажарди.

Шунингдек, Аскер Нажафалиев Осиё Чемпионлар лигаси 2 турнири чорак финал босқичи доирасида “Чонгбук Моторс” – “Сидней” жамоалари учрашувини бошқариб борди. Бахтиёрхўжа Шавкатов ва Руслан Серазетдинов ёрдамчи ҳакам, Фирдавс Норсафаров ВАР, Абдурашид Худайберганов эса АВАР ҳаками сифатида ишлади.

Осиё Элит Чемпионлар лигаси 1/8 финал босқичи доирасидаги “Ал-Насср” – “Истиқлол” учрашуви Ўзбекистоннинг 2024 йилдаги энг яхши рефериси – Ильгиз Танташев бошчилигидаги ҳакамлар бригадасига ишониб топширилди. Унга қанотларда Андрей Цапенко ҳамда Тимур Гайнуллин ёрдам берган бўлса, Фирдавс Норсафаров ВАР, Аҳрол Рисқуллаев АВАР ҳаками вазифасида иш олиб борди.

Эртага, 12 март куни Валентин Коваленко Осиё Чемпионлар лигаси 2 турнири чорак финал босқичи доирасидаги “Шаржа” – “Шабаб Ал-Аҳли” учрашувида ҳакамлар инструктори сифатида фаолият юритади.