Гвардиоланинг Ҳусановга муносабати ҳақида ёзишди
- 31-декабр 2024, 23:05
- Zohir Toshxo’jayev
- 0
- Футбол
Абдуқодир Ҳусанов Европада мавсум кашфиётига айланди. “Ланс” марказий ҳимоячисига “Пари Сен-Жермен”дан бошланган қизиқиш “топ-5” чемпионатларининг катта клубларига кўчди. Сўнгги пайтда 20 ёшли вундеркинд учун курашга Туркия грандлари ҳам қўшилди.
Бир неча манбалар ўзбек легионери Англиянинг амалдаги чемпиони “Манчестер Сити” назарига тушгани ҳақида хабар бериб ўтган эди. Ҳозир инқирозни бошдан ўтказаётган “шаҳарликлар” таркибда жиддий ўзгаришлар қилишни режалаштирмоқда.
Клуб шартномасини 2027 йилгача узайтиришга розилик берган Хосеп Гвардиола олдида турган дастлабки вазифа таркибни яна юқори мақсадлар сари курашадиган ҳолатга келтиришдан иборат. Бунинг учун испан мутахассиси лойиҳага янги ижрочиларни жалб қилиши кутилмоқда.
“Челси” фаолиятини ёритишга ихтисослашган Chelseanews нашри Абдуқодир Ҳусанов учун курашга “Манчестер Сити” ҳам қўшилгани ва “аристократлар” ўзбек футболчисини қўлга киритиш учун Англия Премьер-лигаси вакиллари орасида “шаҳарликлар”дан ташқари, “Тоттенхэм” ва “Ньюкасл” билан рақобатлашишига тўғри келишини ёзди.
Манбанинг ёзишича, манчестерликлар “Ланс”нинг Франция кубоги доирасида ПСЖга қарши ўтказилган учрашувда Абдуқодир Ҳусановнинг ўйинини кузатган ва таҳлил қилган, айнан мана шу баҳсдан кейин улар 20 ёшли ўзбек ҳимоячисининг иқтидорини юқори баҳолаган.
- Абдуқодир Ҳусанов нафақат жисмоний ва тезкор хусусиятлари, балки табиатан ноёб спорт интеллекти билан кўплаб клубларни ҳайратга солмоқда. Ўзбек футболчиси майдонга тушган учрашувларда рақибларнинг “Ланс” дарвозаси олдидаги аҳволи қийинлашиб кетяпти.
Европанинг қатор клублари Ҳусановга даъвогарларнинг кўплиги боис, трансферни амалга оширишда кучли рақобатга дуч келади. Қолаверса, “Ланс” талаб қилаётган 30 миллион евро ноёб истеъдод соҳибини қўлга киритишни мақсад қилган бадавлат жамоалар учун у қадар катта харажат ҳисобланмайди.
Хосеп Гвардиола Абдуқодир Ҳусановга шахсан қизиқиб қолган. Испаниялик мутахассис бу ўйинчи орқали ҳимоя чизиғини мустаҳкамлашни мўлжалламоқда ва трансферни январь ойидаёқ амалга оширишга тайёр. Ҳусанов – Англия чемпионларининг нишонидаги ўйинчилардан бири.
Бироқ шу ўринда, Ўзбекистон миллий терма жамоаси марказий ҳимоячисини “Пари Сен-Жермен”, “Атлетико Мадрид”, “РБ Лейпциг” каби бошқа лигаларнинг қудратли клублари ҳам ўз сафига қўшиб олишни мақсад қилган, - деб ёзмоқда нуфузли манбалардан ESPN нашри.
Абдуқодир Ҳусанов 19 ёшидаёқ Европага қадам қўйган. “Бунёдкор” академияси тарбияланувчисини 2023 йилнинг ёзида “Ланс” Беларуснинг “Энергетик-БГУ” жамоасидан 100 минг еврога трансфер қилган эди.
Легионеримиз ўз салоҳиятини намойиш қилиши учун бир мавсум кифоя қилди. Дебют йилида асосан етакчи ҳимоячиларга ўринбосар сифатида 15 та учрашувда тўп тепган Абдуқодир тақдир тақозоси билан жорий мавсум бошиданоқ асосий таркибда ўйнаш имконига эга бўлди.
Ҳусанов бу вазиятдан юз фоизлик фойда чиқарди. Энди у фаолиятини янги босқичга кўтариш арафасида турибди. Буёғига 20 ёшли ҳимоячимиз энди юқори мақсадлар, нуфузли совринлар учун курашадиган кучли клубларда тўп тепишини кутиб қоламиз...