Гвардиола ва Кевин де Брюйне уришиб қолдими?

Англиянинг амалдаги чемпиони “Манчестер Сити” бош мураббийи Хосеп Гваридиола жамоа етакчиларидан Кевин де Брюйне билан уришиб қолгани ҳақида маълумотлар тарқатилмоқда.

Испаниялик мутахассис бу хабарларга муносабат билдирди.

- Одамлар Кевин билан муаммом борлигини гапиряпти. Нима менга Кевинни ўйнатмаслик ёқади, деб ўйлайсизларми? Кевин ўйнашини истамайманми? Катта иқтидорга эга футболчи менга керак эмасми? Тўққиз йил бирга ишлаганимиздан кейин унга шахсий хусуматим борми?

Кевин Де Брюйне бу клубга энг кўп ҳисса қўшган йигит, бироқ у ўтган мавсумда беш ой, бунисида икки ой жароҳатда эди. Ёши 33 да. Ўзининг энг зўр спорт формасига чиқиб олиш учун унга вақт керак. Бунга ўтган мавсумдагидек босқичма-босқич эришади.

У тикланишга, ўзини яхши ҳис қилишга ҳаракат қиляпти. Мен унинг энг зўр ўйинларини кўрсатишини истайман, - деди Хосеп Гвардиола.

Жорий мавсумда бельгиялик футболчи барча турнирларда 11 та учрашувда қатнашиб, биттадан гол ва ассист муаллифи бўлди.