Гвардиола Ҳусановга қандай талаблар қўйди?

Ҳозирги “Манчестер Сити”нинг энг нозик нуқтаси ўнг қанот ҳимояси ҳисобланади. Хосеп Гвардиола анчадан бери таркиб танлашда бу позицияни ёпишга қодир ўйинчи топишга қийналиб келаётган эди.

Илгари ҳимоянинг ўнг қанотида Кайл Уокер ўйнаган.  Англиялик футболчи “Этихад” аренада саккиз йил тўп тепди. Бу муддат ичида у 319 та учрашувда иштирок этиб, жамоа билан 18 та соврин ютди, Англия Премьер-лигаси тарихидаги энг зўр қанот ҳимоячилардан бири сифатида эътироф этилди.

Кайл Уокер январда клубни тарк этганидан кейин унинг ўрнида асосан Матеуш Нуньеш ва Рико Льюис ўйнаб келаётган эди. Жорий мавсумнинг бошидаги учрашувларда бу ҳимоячиларнинг хатоси жамоанинг икки мағлубиятига сабаб бўлди. Шундан кейин Хосер Гвардиола бу позицияга асли марказий ҳимоячи бўлган Абдуқодир Ҳусановни қўйди.

Ўзбек футболчиси “Манчестер Юнайтед”, “Наполи” ва “Арсенал”га қарши учрашувларда ўнг қанотда зўр ўйнаб берди, мухлису мутахассислар уни Кайл Уокернинг ўрнини босишга қодир ўйинчи эканини тан олди.

Хосеп Гвардиола “Манчестер Сити”нинг расмий сайти – mancity.com ходимлари билан суҳбатда ўнг қанот ҳимоячиси қандай ўйнаши ҳақида фикр-мулоҳазаларини билдириб ўтди.

- Ҳозирги ўйинчиларимиз худди Кайл Уокерга ўхшаб ўйнаши керакми? Йўқ, албатта. Чунки Кайлнинг кўникмалари ўзиники, бошқалар эса, ўзларига тегишли маҳоратга эга.

Менга қолса, илгари бизга жуда кўп ёрдам берган аввалги ўйинчиларнинг барчасини ҳам жамоада қолишини истаган бўлардим.  Лекин футбол шунақа. Кимдир кетишни хоҳласа, клубда қолмоқчи бўлмаса, биз нима ҳам қила олардик?

Бизда ўз карьерасини қураётган бошқа ўйинчилар бор. Ўз ишингизни бажаринг, маҳорат ва кўникмаларингизни ишга солинг, профессионаллардек яшанг, ҳар ҳафта битта ёки учта учрашувда қатнашинг – мана шуларнинг клубнинг талаби.

Абдуқодир Ҳусанов, Матеуш Нуньеш ва Рико Льюис шу клубда ўз фаолиятини қуриб, уни ривожлантириб бориши керак.

Жамоада узоқ муддат ўнг қанотни эгаллаб келган Кайл Уокернинг ўрнини босиш жуда оғир, албатта. Чунки у саккиз йил давомида бир мавсумда 55-60 та учрашув ўтказган пайтлар бўлган. Совринлар ютганмиз, бироқ бу фақат Кайл туфайли бўлмаган. Унинг ўрнини тўлдириш  қийин, лекин клуб шундай қилиши керак.

Ҳусановнинг ўнг қанотдаги ўйини ҳақида нима дейишим мумкин? Абдуқодир қанотда яқинда ўйнай бошлади ва мен унинг ҳаракатларидан қониқяпман. Бу позицияда Матеуш Нуньеш, Рико Льиюс ва Жон Стоунз ҳам ўйнаши мумкин. Бу нуқтаи назардан ҳаммаси жойида, аммо клуб ўнг қанот ҳимоясига янги ижрочи қидиряптими ёки йўқ, бунисини билмайман, - деди Хосеп Гвардиола.

Абдқодир Ҳусанов 2025 йилнинг 20 январидан келганидан бери барча турнирларда 15 та учрашувда майдонга тушиб, ўз ҳисобига битта гол ҳам ёздириб қўйган. Жорий мавсумдан эътиборан, 21 ёшли ҳимоячимиз Хосеп Гвардиола жамоасида асосий таркиб ўйинчисига айланди.

Гвардиола: Ҳусановни кутманг!

​“Қоя”, “Жангчи” ёки “Афсунгар”: Ҳусановнинг Англияда яна қандай лақаблари бор?

Фанатлар талаби: Ҳусановни “Барса”га олиб келинг!

Ҳусанов қачон майдонга қайтишининг аниқ санаси эълон қилинди!

Фанатлар Ҳусановдан мўъжиза кутяпти!

“Сити” Ҳусановсиз ўйнашни ўрганиши керак