Геннадий Головкин-"Канело" ўртасидаги 3-жанг борасида Ўзбекистон бокс олами вакиллари қандай фикрда?

Бутунжаҳон профессионал бокс оламидаги энг шов-шувли жанглардан бири қозоғистонлик Геннадий Головкин ҳамда Мексика вакили Сауль "Канело" Альварес ўртасидаги трилогияга ҳам бир неча кун қолди. 17 сентябрь куни АҚШнинг Лас-Вегас шаҳри "T-Mobile Arena"да бўлиб ўтувчи ушбу қарама-қаршилик ҳақида жаҳон тан олган эксперт ва мухлислар турли хил фикр билдиришмоқда. Биз ҳам анъанага мувофиқ Ўзбекистон бокс олами вакилларининг фикри билан қизиқдик. 

Қувончбек Тойғонбоев - мураббий

- Улар иштирокидаги 2 жанг ҳам қизиқарли тарзда кечган. Ҳар иккисининг бир-бирига нисбатан катта устунлик жиҳати йўқ. Головкинда битта мағлубият ва бир дуранг бор. Бу сафар у жуда кучли иштиёқ билан жанг қилади ва ғалаба қозонишга ҳаракат қилади. Ўйлайманки, бу сафар Головкин зафар қучади.

Ғайрат Аҳмедов - собиқ боксчи

- Аввало, барчасини Аллоҳ билгувчидир! Энди, мени фикримга келадиган бўлсак, ҳар иккиси тажрибали ва профессионал боксда ўз сўзини айта олган. Агар, Головкин 6-раундга қадар, нокаут қила олмаса, ўзи нокаутга учраши мумкин. 

Элшод Расулов - мураббий

- Головкин ҳамда "Канело" бугунги кунда дунёнинг энг кучли боксчилари ҳисобланади. Тўғриси, менга кўпроқ "Канело"нинг услуби ёқади. Кутилмагандаги аниқ ва тезкор зарбалар эгаси саналади. Назаримда "Канело"да имконият яхшироқ... 

 Бобур Нажмиддинов -мураббий

- Бу жуда ҳам принципиал жанг бўлади. Чунки, "Канело" сўнги жангида Биволга мағлуб бўлди. Головкинда эса, "Канело" билан боғлиқ аламли мағлубият бор. Демоқчиманки, ҳар иккисида ҳам кучли мотивация мавжуд. Тўғри, кўпчилик Головкинни ёши ўтганлигини гапирмоқда. Бироқ, у охирги жангида япониялик Олимпиада ва жаҳон чемпиони Риота Муратани ўз уйида қандай мағлуб этганлигини барча гувоҳига айланди. "Канело" ушбу жанг борасида кўп хиссиётларга берилмоқда ва қайсидир маънода ўзига ортиқча босим юклаяпти. Мен Головкиндан ўзгача жанг кутяпман ва унга мухлислик қиламан. Ўйлайманки, Головкин бу сафар муваффақиятга эришди. 

Фазлиддин Ғоибназаров - боксчи

- Тўғриси, бу жанг борасида бирор тахмин билдириш қийин. Рингда ҳар қандай воқелик бўлиши мумкин. "Канело" роса меҳнат қиляпти. Бироқ, мен Головкинда имконият юқори, деган фикрдаман.

Ҳасанбой Дўсматов -боксчи

- Жуда қизиқарли ва томошабоп жанг бўлади. Улар ўртасидаги 2 та баҳс ҳам мухлисларни асло зериктириб қўймаган. Тўғриси, Головкинга мухлислик қиламан. Бироқ, барибир Сауль Альваресда имконият яхшироқ. 

Мирзакамол Неъматов - боксчи

- Бу жангда ёш ўз сўзини айтса керак. Яъни, Головкиннинг ёши бироз ўтди, деб ўйлайман. Шунинг учун "Канело" устун келади, деган фикрдаман. Аммо, барчаси рингда ҳал бўлади. 

Муҳаммадюсуф Нажмиддинов -мураббий

- Қизиқарли жангни гувоҳига айланамиз. Ҳар иккиси бор имкониятини ишга солади. Головкиннинг исботлайдиган жиҳатлари бор. Бироқ, ёш борасида бироз муаммолар юзага келиши мумкин. Шунинг учун, очколар ҳисобида "Канело" ғалаба қозонса керак. Лекин GGG яхши жанг кўрсатишига ишонмоқдаман. 

Лазизбек Муллажонов -боксчи

- Яхши жанг бўлади. Бу жангдан мухлислар ютади, деб ўйлайман. Негадир, Головкин "Канело" билан чўчиброқ ҳаракат қиляпти. Албатта, GGGга мухлислик қиламан. Аммо, ғалаба қозониш учун "Канело"да имоният катта.