Гапдон "Насаф" ходими қонун олдида ҳам жавоб бериши керак

Кеча бўлиб ўтган "Динамо" - "Насаф" (2:2) учрашувидан сўнг "аждарлар" матбуот хизматида ишловчи Сарвар Бобоназаров ўзининг "Х"даги саҳифаси орқали ўта "ширин" сўзлар билан самарқандликллар ва "Динамо" мухлисларини "сийлаган". Бу ерда ғайритабиий туюлаётган жиҳат клуб матбуот хизматида ишловчи шахс ижтимоий тармоқларда шунақа одобсизлик қилиши. Яъни, биз миясини чўнтагида олиб юрадиган ёки барибир ишлатмаяпман-ку, деб сандиққа солиб қўядиган айрим "тили ширин" мухлисларнинг бунақа фаросатсиз коммент ёки твитларига кўп гувоҳ бўламиз. Бироқ клуб матбуот хизматида ишловчи шахснинг савияси бунақа эканлигига шахсан мен илк бор гувоҳ бўлишим. 

Аслида, вазият фақат савиянинг пастлиги билан ёпилиб кетиши керак эмас. Билсангиз керак, ижтимоий тармоқларда вилоятликларни ёки тошкентликларни камситган айрим "оқсуяк" фуқаролар нечадир суткага қамалгани ва жаримага тортилгани ҳолатларига гувоҳ бўлганмиз. Бу ҳам худди шунга ўхшаш ҳолат ва Сарвар Бобоназаров ҳам қонун олдида жавоб бериши керак. 

Билишимизча, у  "Насаф" клуби раҳбарияти томонидан ишдан бўшатилган. Ҳа, "аждарлар"нинг медиаси бу мавсумда яхши ишлаётганди ва Сарвар Бобоназаровнинг ҳам бунда ўз ҳиссаси бор эди. Иш бу - профессионализм. Аҳлоқ умуман бошқа масала. Мен ҳар қандай ҳолатда бутун бошли вилоятликларга нисбатан айтиладиган бу каби сўзларни нормал қабул қила олмайман. Буни ультра фанатизм эмас, ультра аҳлоқсизлик, деб ҳисоблайман. Кимдир мана шунақа бошқа клуб ва бошқа вилоятликларни таҳқирловчи твитлари ва комментлари учун жазоланса, бу бошқаларга ўрнак бўлишига ҳам ишонаман. 


 

Карим Худайқулов