Ғалати дуэл: Шомуродов ёки Довбик?
- 12-феврал 2025, 18:09
- Ali Ahmadxo’jayev
- 1
- Футбол
А Сериянинг 24-турига келиб, “Рома” чемпионат ўйинлари орқали Европа Чемпионлар лигасига йўлланма ола билмаслиги ойдинлашиб қолган.
Чунки пойтахт “бўрилари” қитъанинг энг нуфузли турнирига йўлланма берувчи сўнгги поғона – тўртинчи ўринда бораётган “Лацио”дан 11 очко орқада қолмоқда. Орада эса, “Ювентус”, “Фиорентина”, “Милан”, “Болонья” каби мавсумни яхши ўтказаётган жамоалар ҳам “Лацио”дан бу поғонани тортиб олиш учун курашмоқда.
“Рома” Италия кубоги учун ҳам курашни тўхтатганини инобатга олсак, Клаудио Раньери шогирдларида мавсумни муваффақиятли якунлаши Европа лигасидаги натижаларга боғлиқ бўлади.
Пойтахтликлар янги форматда ўтказилаётган бу мусобақанинг умумий босқичидан бир амаллаб ўтиб олди. Энди римликлар нимчорак финалга чиқиш учун плей-оффнинг ўтиш ўйинида “Порту” билан иккита учрашувда куч синашиши лозим.
Биринчи ўйин 13 февраль куни Португалияда бўлади.
“Рома” фаолиятини кузатиб бораётган мухлису мутахассисларни бош мураббий Клаудио Раньери “Порту”га қарши учрашувда марказий ҳужумчи ўрнини қайси футболчини ўйнатиши қизиқтириб келмоқда.
Мавсум бошидан бери асосий ҳужумчи вазифасини украиналик Артём Довбик бажариб келган бўлса, кейинги пайтда Элдор Шомуродов катта саҳнага чиқди.
Хусусан, Раньери “Наполи” ва “Милан” каби қудратли рақибларга қарши Элдор Шомуродовни илк дақиқалардан майдонга ташлади. Аутсайдер “Венеция”га қарши баҳсда Артём Довбик бошланғич таркибдан ўрин олди.
Журналистлар бу масалага ойдинлик киритиш учун Клаудио Раньеридан “Порту”га қарши қайси ҳужумчидан фойдаланишини сўрашди. Аввалига Раньери бу саволга жавоб бериш ўрнига, “ҳаммага хайр”, деб ўрнини бўшатди.
Кейин эса, саволга қисқа жавоб берди.
- Мен олдиндан ҳеч кимга устунлик бермайман. Вазиятга қараб иш тутаман. Аввал “Порту”ни ўрганиб чиқай. Шунда ҳам сизларга ким ўйнашини айтмайман, - деди Клаудио Раньери.
Футбол экспертлари айни пайтда “Рома” мураббийлар штаби “Порту”га қарши баҳсда қайси форварддан фойдаланини очиқ турган масала эканини айтмоқда. Бироқ шунга қарамай, аксарият экспертлар танлов қайси ҳужумчи чекига чиқиши Раньери қўллайдиган ўйин тактикасидан келиб чиқишини таъкидлашяпти.
Хусусан, улар “Рома” рақибнинг ҳужумини ушлаб қолиш ва кескин қарши ҳужумларда ўйнашга эътибор қаратадиган бўлса, бу усулда Элдор Шомуродовнинг устунлиги катта эканини таъкидлашмоқда. Агар римликлар рақиб майдонида ҳам ҳужумкор ўйин услубини қўллайдиган бўлса, учрашувни бошлаш Артём Довбикка топширилиши мақсадга мувофиқ эканини айтишмоқда.
Демак, тез орада Клаудио Раньерининг танлови қайси ҳужумчисига тушишини билиб оламиз. Нима бўлган тақдирда ҳам, энг асосийси, “Порту” тўсиғидан муваффақиятли ўтиб олиш ва мусобақада бош соврин учун курашни давом эттириш муҳим.
Шомуродовни машҳур клуб олмоқчи!
Шомуродовга кутилмаган янги харидор чиқди, лекин...
Жаҳон чемпиони Ҳусановга қандай баҳо берди?