Френки де Йонг “Барса”ни “тупик”га тиқиб қўйди

“Барселона” раҳбарияти анчадан бери нидерландиялик плеймейкер Френки де Йонгнинг масаласини ҳал қила олмаяпти.

28 ёшли футболчи ўзига қудратли клублардан таклиф бўлган пайт Каталониядан кетишни истамади. Клуб катта маош олаётган ўйинчининг қолишига қарши эмас, лекин шартномани янгилаб қўймоқчи. Музокаралар жуда суст кетмоқда. Шу боис, Френки де Йонг ўзининг манфаатларини ҳимоя қилиб келаётган агент Али Дурсунни ишдан бўшатди.

AS нашрининг ёзишича, бу ҳолат “Барселона” мутасаддиларини “тупик”га тиқиб қўйди. Улар ҳамкорлик бўйича музокара ким билан қандай олиб боришни билмаяпти. Чунки айни пайтда Френки томонидан музокара олиб борадиган бирорта расмий вакил йўқ.

Энди каталонияликлар 2019 йилдан бери “Барселона”да ўйнаб келаётган нидерландиялик юлдуз ўзига янги футбол агенти олишини кутишга мажбур.