Финал чипталари қандай қўлга чиқиб кетди? Нега iticket онлайн платформаси ишламагани? Мухлислар билет сотиб олиши борасида расмий маълумот берилди
- 17-июн 2022, 23:32
- Bekzod Isayev
- 9
- Футбол
19 июнь куни "Бунёдкор" стадионида U-23 Осиё Кубоги финал баҳси ўтказилади. Ўзбекистон олимпия терма жамоаси Саудия Арабистонига қарши майдонга чиқади. Ушбу ўйинга бўлган қизиқиш жуда юқори эди. Ҳамма чипталар сотувга чиқишини кутаётганди. Чипталар сотувга чиқдию катта қисми олиб-сотарлар қўлига чиқиб кетди. Iticket.uz онлайн платформаси эса ишламай қолди.
Ушбу ҳолатлар юзасида ЎФА матбуот хизмати раҳбари Даврон Файзиев қуйидагиларни маълум қилди.
- Ҳозирги кунда U-23 Осиё Кубоги Ўзбекистон - Саудия Арабистони ўртасидаги финал учрашувига қизиқиш жуда ҳам кўп. Бунга сабаб Олимпия терма жамоамизнинг ёрқин ўйини ва мухлисларнинг уларга бўлган меҳри.
Бугун финал учрашувини кўриш ниятидаги кўплаб мухислар "Бунёдкор" стадиони кассаларига бориб, чипталарни кассадан харид қилишга ҳаракат қилди. Шунингдек, iticket.uz онлайн платформаси орқали ҳам сотиб олишга уринишди. 19 июнь куни финални стадиондан кўриш ниятидаги мухлислар жуда кўпчиликни ташкил этмоқда ва бугун "Бунёдкор" стадиони кассалари олдида кўплаб инсонлар тўпланган. Афсуски, улар орасида кўп миқдорда чипта харид қилишни ният қилган чайқовчилар ҳам бор эди. Натижада бироз тартибсизликлар юзага келди.
Шунингдек, мухлислардан шикоят келиб тушяптики, iticket.uz онлайн платформасида ҳам чипта сотуви йўлга қўйилмаган деб. Биз бу борада iticket.uz компаниясига мурожаат қилдик ва улар шундай изоҳ беришди: бугун сайтга ташриф буюрувчилар жуда кўпчиликни ташкил этди ҳамда техник носозлик юзага келди. Яқин вақт ичида бу носозлик бартараф этилади ва чипталар сотуви онлайн тарзда йўлга қўйилади.
Қолаверса, "Бунёдкор" стадиони кассаларида ҳам чипталар сотуви давом эттирилади. Iticket.uz компаниясининг маълум қилишича, бугун 10 мингта чипта сотилган. Умид қиламизки, iticket.uz платформасидаги чипталар сотуви йўлга қўйилади ва ҳозирги кузатилаётган муаммолар тезда бартараф этилади. Олимпия терма жамоамизга эса ғалаба тилаймиз, - деди Даврон Файзиев.