Файзуллаевнинг янги жамоадоши роса мақтанчоқ чиқиб қолди
- 18-феврал 2025, 12:24
- Zohir Toshxo’jayev
- 0
- Футбол
ЦСКА клуби Россия Премьер-лигасининг иккинчи қисмида юқори ўринлар учун курашиш мақсадида таркибини кучайтиришга ҳам эътибор қаратмоқда.
Клуб матбуот хизмати жамоага бразилиялик тўпурар ҳужумчи Алеррандро келиб қўшилганини эълон қилди.
Янги ўйинчининг ўзига ишончи баланд экани янги жамоаси мухлисларига ўзини қандай таништирганидан ҳам билиниб турибди.
- Мен жуда ақлли ҳужумчиман. Тўпни қабул қилиб олиш учун ортга қайтиб ўйнайдиган оддий форвардлар қаторига кирмайман.
Майдон бўйлаб кўп ҳаракат қиламан. Нафақат гол ураман, балки голли паслар ҳам узатишни биламан. Мен жамоадошларимни рақиб дарвозабони билан бирга бир вазиятга чиқариб юборишни яхши кўраман.
Ўзимнинг кучли томонларимдан келиб чиқиб, жамоа ўйинига тез мослашиб кетаман, - деди Алеррандро.
ЦСКА янги ҳужумчи билан келишувни 2028 йилнинг ярмигача тузди. Томонлар ўзаро келишган ҳолда ҳамкорликни яна бир йилга узайтириши мумкин.
Алеррандро ЦСКАда 7-рақамни танлади.
25 ёшли футболчи “Атлетико Минейро” клуби тарбияланувчиси ҳисобланади ва фаолияти давомида “РБ Брагантино” ҳамда “Витория” жамоаларида ҳам тўп тепган.
Алеррандро “Витория” сафида самарали ўйнаб, Бразилия чемпионатида ўтган мавсум 15 та гол билан энг яхши тўпурар бўлган эди.
Таъкидлаш жоизки, ЦСКА клуби ҳужум чизиғи етакчиси Аббосбек Файзуллаев ҳисобланади. Ҳамюртимиз 2023 йилнинг ёзида “армиячилар” сафига кўчиб ўтганидан бери жамоа ҳужумларини ташкил этишда жонбозлик кўрсатиб келмоқда.
Энди 21 ёшли легионеримиз Премьер-лига ўйинлари бошлангунича олдинги чизиқда Алеррандро билан бирга ўйнаш кўникмаларини шакллантиришига тўғри келади.
Transfermarkt порталининг маълум қилишича, “армиячилар” катта мақсадлар билан Европа футболига кириб келган ўйинчи учун “Ред Булл Брагантино” клубига 4,2 миллион евро миқдорида бадал пули тўлагани қайд этилган.
Гвардиола “Реал” билан ўйин олдидан Ҳусанов ҳақида нималар деди?