Файзуллаевга янада қийин бўлади! Аббосга Бундеслигадан рақобатчи келади
- 15-август 2023, 22:22
- Zohir Toshxo’jayev
- 0
- Футбол
Россия Премьер-лигасида юқори мақсадлар учун курашаётган Москванинг ЦСКА клуби 4 август куни “Пахтакор” тарбияланувчиси Аббосбек Файзуллаевни трансфер қилгани ҳақида расмий маълумот тарқатган эди.
Файзуллаев пойтахт армиячиларининг ҳужум чизиғини кучайтириш мақсадида трансфер қилинди. Ҳозирча, легионеримиз иккита учрашув қайдномасига киритилган бўлса-да, ҳали расман дебютини нишонлагани йўқ.
ЦСКА бош мураббийи Владимир Фёдоров 19 ёшли ўзбек футболчиси айни пайтда тайёргарлик босқичини ўтаётганини маълум қилди.
Москва клуби ҳужум чизиғига яна ўйинчи олиш бўйича ишламоқда. Россия матбуотининг ёзишича, армиячилар Бундеслигада иштирок этаётган “Айнрахт”дан 27 ёшли Рафаэль Боррени олиб келмоқчи.
ЦСКА мутасаддилари тажрибали колумбиялик футболчини бир мавсум ижарага олиб ўйнатишни режалаштирмоқда.
Рафаэль Борре ўз юртида “Депортиво Кали” клубида тарбияланган. Лекин анчадан бери Европа топ бешлик чемпионатларида тажриба тўплади. Ҳужумчи Испания чемпионатида “Атлетико” ва “Вильярреал” жамоалари шарафини ҳимоя қилган.
2017 йилдан 2021 йилнинг ёзигача Аргентинанинг энг кучли жамоаларидан ҳисобланган “Ривер Плейт” жамоасида тўп тепди. Кейин яна Европага қайтиб, “Айнтрахт” таркибидан жой олди.
Рафаэль Борре Колумбия, Аргентина, Испания, Германия клубларида жами 334 та учрашувда майдонга тушиб, рақиблар дарвозасини 101 маротаба ишғол қилган ва жамоадошларига 39 та голли пас узатган.
Шунингдек, Колумбия терма жамоасида 24 та ўйинда ўз ҳисобига учта гол ёздириб қўйди.
Эътиборли жиҳати шундаки, Аббосбек Файзуллаев сингари Борре ҳам бир неча позицияда ўйнай олади. Ҳар икки футболчи ҳужумчи ортида ва ўнг қанот ҳужумида фаол ўйнайди. Ҳамюртимиздан фарқли равишда колумбиялик форвард марказий ҳужумчи сифатида ҳам ҳаракат қилади. Аббоснинг устунлиги сифатида чап қанот ва майдон марказида ҳам ўйнаш олиш қобилияти яхши шаклланганида экани таъкидламоқда.
Борре “Айнтрахт” билан 2025 йилнинг ёзигича давом этадиган шартномага эга. Бу футболчи ўтган мавсумда самарали ўйин кўрсата олмади. Бундеслигада 32 маротаба баҳсларда қатнашиб, ўз ҳисобига атиги иккита гол ёздириб қўйди ва яна бир жуфт ассист муаллифи бўлди.
Трансферларга ихтисослашган https://www.transfermarkt.world порталига кўра, Рафаэлнинг трансфер суммаси 9 миллион еврони ташкил қиляпти.
Аббосбек Файзуллаевнинг ЦСКА билан амалдаги шартномаси 2026 йилнинг ёзигача амал қилади ва томонлар ўзаро келишган ҳолда уни яна бир мавсум узайтириши мумкин. Истеъдодли ярим ҳимоячини тарбиялаган “Пахтакор” бу трансфердан 500 минг евро атрофида маблағ ишлаб олгани қайд этилган.