Файзуллаев: Скаутлар аргентиналик ҳимоячини кўргани келиб, Ҳусановни олиб кетишди
- 14-июн 2025, 17:14
- Zohir Toshxo’jayev
- 1
- Футбол
Ўзбек футболи тарихида бир неча муҳим трансферлар бўлган. Бироқ миллий футболимиздаги энг муҳим трансфер, шубҳасиз, Абдуқодир Ҳусановнинг “Ланс”дан “Манчестер Сити”га кўчиб ўтгани бўлди.
Январь ойида “шаҳарликлар” ўзбек ҳимоячиси учун Франция клубига 40 миллион евро бадал пули тўлашига тўғри келди. Бу ўзбек футболида ҳам, “Ланс” тарихида ҳам энг катта трансфер сифатида қайд этилди.
Бироқ Абдуқодир Ҳусанов “Манчестер Сити”га қўшилгунига қадар катта йўлни босиб ўтишига тўғри келди. Абдуқодирнинг дўсти Аббосбек Файзуллаев “Nobel” YouTube-каналига берган интервьюсида футболчининг қандай қилиб “топ-5” лигаларидаги жамоалар эътиборига тушганини гапириб берди.
- Ҳусанов воқеасидан хабардорман: Аргентина билан ўйинда скаутлар аргентиналик ҳимоячининг ўйинини ўргангани келган. Бироқ уларнинг эътиборини Ҳусанов тортган. Шундан кейин Абдуқодир “Ланс”га ўтди ва унинг Европадаги фаолияти бошланди. Шундайми?...
- Ҳа, мен ўша учрашувни яхши эслайман. Бу йигирма ёшгача бўлган футболчилар иштирокидаги жаҳон чемпионатида юз берган. Ўша баҳс Аргентинадаги жаҳон чемпионатининг очилиш ўйини, яъни биринчи учрашуви эди.
Стадионга 30 мингдан ортиқ мухлис келган, биз жуда яхши ўйнаганимизга қарамай, 1:2 ҳисобида мезбонларга ютқазганмиз. Ўша ўйинда Абдуқодир Ҳусанов зўр ўйнади. Жаҳон чемпионатида Ҳусанов салоҳиятини жуда яхши намойиш қилди ва ўзига йўл очди, - деди Аббосбек Файзкллаев.
Эслатиб ўтамиз, Абдуқодир Ҳусанов футболнинг дастлабки сир-асрорларини “Бунёдкор” академиясида ўрганган. Кейин Беларусга йўл олган футболчи профессионал фаолиятини 2022 йили “Энергетик-БГУ”да бошлади.
Бир йилдан кейин Франциянинг ўша пайтдаги вице-чемпиони “Ланс” ўзбек ҳимоячисини 100 минг еврога харид қилди. Лига 1 жамоасида бир ярим йил ўйнаган футболчи охир-оқибат “Манчестер Сити”дан қўним топди.
Аббосбек Файзуллаевнинг ўзи эса, 2023 йил август ойида “Пахтакор”дан Москванинг ЦСКА клубига кўчиб ўтди. Ҳужумкор футболчи Россиядаги дебют мавсумининг ўзидаёқ янги жамоаси етакчисига айланди ва Премьер-лиганинг асосий кашфиёти сифатида эътироф этилди.
Якунланган мавсумда Аббосбек Файзуллаев илк совринларини қўлга киритди. 21 ёшли легионеримиз “армиячилар” сафида Россия чемпионати бронза медали совриндори ва мамлакат кубоги соҳиби бўлди.
Айни пайтда ўзбекистонлик футбол ишқибозлари Аббосбек Файзуллаевнинг ҳам Европадаги кучли лигаларга йўл олишини кутмоқда. Охирги йилларда “Бавария”, “Парма”, “Женоа”, “Монако”, “Реал Сосьедад” каби клублари Файзуллаевга қизиқиш билдираётгани ҳақида маълумотлар тарқатилган эди.
Аббоснинг ўзи айни пайтда бор эътиборини ЦСКАдаги фаолиятига қаратганини, бироқ асосий мақсади Европанинг топ-клубларида ўйнаш эканини айтиб келади.