Файзуллаев Роналду билан бир турнирда ўйнаши мумкин
- 7-феврал 2025, 18:08
- Ali Ahmadxo’jayev
- 0
- Футбол
Жаҳон футболида энг кўп гол урган 40 ёшли футболчи Криштиану Роналду Саудия Арабистонининг “Ан-Наср” клубидаги фаолиятини муваффақиятли давом эттирмоқда.
Москванинг “Динамо” жамоаси португалиялик футболчи “Ан-Наср”да ўйнаётганини инобатга олиб, бу клубни “Биродарлик кубоги” турнирига таклиф этилди. “Динамо” клуби директорлар кенгаши раиси Дмитрий Грифиннинг шахсан ўзи “Ан-Наср” мутасаддиларини жамоани мусобақага қатнашишга чақирганди.
- “Динамо” клуби “Ан-Наср”нинг барча ўйинчиларини Москва шаҳридаги дўконимизга таклиф этади. Уларга 50 фоизлик чегирма беришга тайёрмиз. Шунингдек, худди биз ва ЦСКА ҳам “Ан-Насп”ни “Биродарлик кубоги” иштирокчилари орасида кўришдан хурсанд бўлардик, - деди Дмитрий Грифин.
“Ан-Наср”нинг тижорий ишлар бўйича директори Жорди Дюренте бу масала клуб раҳбарияти томонидан кўриб чиқилишини маълум қилди.
- Биз ҳар доим халқаро ҳамкорлик йўлларини қидирамиз. Россия – катта бозор, яқинда бу ерда жаҳон чемпионати ўтказилган эди. Бу мамлакатда футболга қизиқадиган одамлар кўп. Биз турнирда иштирок этиш имкониятини ўрганиб чиқиш ва баҳолашга тайёрмиз.
Бу таклифни қабул қилиш бўйича бир қарорга келишдан аввал “Ан-Наср” тақвимида тўғри келадиган вақтни топиш, керакли шароитларни яратиш талаб этилади, - деди Жорди Дюран.
Ўз навбатида, “Биродарлик кубоги” иштирокчиси ЦСКА клуби бош директори Роман Бабаев “Динамо” раҳбарининг мусобақага “Ан-Наср”ни таклиф қилиш ғоясини қўллаб-қувватлади.
- Ажойиб ғоя. Бу мусобақа иккинчи йил ташкил қилиняпти. Унда Криштиану Роналдунинг қатнашиши зўр иш бўларди, - деди Роман Бабаев.
Маълумки, ушбу мусобақа 2023 йили Россия ва Сербия ўртасидаги дўстлик алоқаларини мустаҳкамлаш мақсадида ташкил этилган.
2024 йилнинг ёзида иккинч маротаба ўтказилган мазкур турнирда ҳар икки мамлакатдан иккитадан – “Динамо” ва ЦСКА, “Партизан” ва “ОФК Белград” жамоалари иштирок этди.
Унда иккитадан учрашув якунига кўра, мусобақа жадвалида “армиячилар” юз фоизлик натижа билан пешқадам бўлди.
Қизиғи шундаки, ҳамюртимиз Аббосбек Файзуллаев бу галги мусобақада ЦСКАнинг биринчи голи муаллифи ҳисобланади. 2024 йилнинг 4 июль куни бўлиб ўтган учрашувда “армиячилар” Сербиянинг “ОФК Белград” клуби билан куч синашиб, 4:0 ҳисобида зафар қучган ва илк голни ўзбек футболчиси киритган эди.
Аббосбек “Партизан”га қарши кечган ва 3:0 ҳисобида якунланган учрашувда ҳам бир бўлим ҳаракат қилганини таъкидлаш лозим.
Энди “Ан-Наср” раҳбарияти жамоанинг “Биродарлик кубоги” мусобақасида иштирок этишини таъминлаб берса, Аббосбек Файзуллаев беш карра “Олтин тўп” соҳиби Криштиану Роналдуга қарши ўйнаш имконига эга бўлади.