Файзуллаев: Ортга қайтяпман!
- 13-март 2025, 05:49
- Zohir Toshxo’jayev
- 0
- Футбол
ЦСКА жамоаси Россия кубогининг ярим финал дастлабки учрашувида ўз мухлислари кўз ўнгида пойтахтнинг “Динамо” клуби футболчиларини қабул қилди.
Кескин ва муросасиз курашлар остида ўтган учрашув қаҳрамонларидан бири Аббосбек Файзуллаев бўлди. 21 ёшли ҳужумкор футболчимиз 50-дақиқада самарали ҳужум ташкил қилиб, Секу Койтага голли пас узатди. Аббоснинг ўзи ҳам кейинроқ гол уриш имконига эга бўлганди. Легионеримизнинг зарбасини рақиб посбони қайтариб қолди.
Учрашув “армиячилар”нинг 2:1 ҳисобидаги ғалабаси билан якунланди.
Ўйиндан кейин Аббосбек Файзуллаев ўз фикр-мулоҳазаларини билдирди.
Учрашув ҳақида
Пойтахт дербисида ғолиб чиққанимиздан хурсандмиз. Ўйин оғир ўтди. “Динамо” билан ҳар доим очиқ ўйин бўлади. Жисмонан ва руҳан қийин бўлди.
Бунақа дербиларда ҳар доим ғалаба қозониш иштиёқи юқори бўлади. Мухлисларимизга миннатдорлик билдиришни истайман, бу ғалаба айнан уларга бағишланади.
Кисляк ҳақида
Ғалаба тўпини киритган Матвей Кисляк – топ-ўйинчи!
Ҳар машғулотда унинг қандай ўсиб бораётганига гувоҳман. Унга худди шундай давом этишини ва катта муваффақиятларга эришишини тилайман.
Койтанинг голи ҳақида
Биз биринчи бўлимда ҳам яхши ўйнадик. Рақиб футболчиси қизил карточка олганидан кейин ўйиннинг кечиши бироз ўзгарди.
Ҳамма каби мен ҳам Койтанинг голидан шокка тушдим. Қанақасига бунақа гол уриш мумкин? Энг муҳими, бу гол ғалабага хизмат қилди.
Янги ўйин схемаси ҳақида
Тўғриси, аввалги ўйин схемамиз мен учун қулайроқ эди. Мен кўпроқ ўйнардим ва баҳс давомида марказга ўтиб, ҳужумда кескинликни юзага келтирардим. Лекин бош мураббий мен бошқачароқ ўйнашим керак, деган қарорга келди ва буни синаб кўряпмиз.
Бунга кўникиш учун вақт вақт керак бўлди. Мана ўхшай ҳам бошлади. Ҳозир мен кўпроқ ортга қайтяпман, ҳимояланишга кўпроқ куч сарфлаяпман.
Эслатиб ўтамиз, Аббосбек Файзуллаев жорий мавсумда барча турнирларда 26 та учрашув ўтказиб, рақиблар дарвозасини уч маротаба ишғол қилди ва жамоадошларига еттита голли пас узатди.
Россия кубоги ярим финал доирасидаги жавоб ўйини 16 апрель куни “Динамо” жамоаси мезбонлигида ўтказилади. “Армиячилар” кейинги босқичга чиқиши учун бўлажак беллашувда дуранг натижа ҳам кифоя қилади.