Файзуллаев билан дўстликни тўхтатамиз!

Россия Премьер-лигасининг 14-турида уч нафар футболчимиз ўз жамоаси ўйинларида иштирок этди.

ЦСКАдаги ҳамюртимиз Аббосбек Файзуллаев Москва дербисида “Спартак”га қарши ўтказилган беллашувда 64-дақиқа тўп тепди. Бу баҳсда “армиячилар” ўз мухлислари кўз ўнгида 0:2 ҳисобида мағлубиятга учради.

Рустам Ашурматов “Рубин” сафида “Локомотив” меҳмони бўлди ва бу баҳсда пойтахтликлар сўнгги дақиқалардаги гол эвазига уч очкони қўлга киритди. Қозонликлар сафидаги иккинчи легионеримиз Умарали Раҳмоналиев захирада қолдирилди.

“Акрон” жамоаси ярим ҳимоячиси Шерзод Эсонов “Крилья Советов”га қарши йигирма дақиқа ўйнади ва 2:1 ҳисобидаги ғалабага шерик бўлди.

“Локомотив” ва “Рубин” ўртасидаги ўйиндан кейин Рустам Ашурматов ўз фикр мулоҳазаларини билдириб ўтди.

- “Локомотив” ва “Рубин” учрашуви дурангга лойиқ ўйин  бўлди, дейиш мумкин. Лекин омадимиз чопмай, охирида тўп ўтказиб юбордик. Биз мағлубиятни муносиб қабул қиламиз ва курашни давом эттирамиз.

“Локомотив” жуда яхши жамоа, лекин улар чемпион бўла оладими ёки йўқ, буни ҳозир айтиш мушкул. Уларнинг таркибида ҳимоя чизиғи ва ҳужумда ўйнайдиган сифатли футболчилар жамланган. Бу жамоа кўп нарсага қодир, - деди Рустам Ашурматов.

Шунингдек, тажрибали ҳимоячи “Рубин” кейинги учрашувда ЦСКАга қарши майдонга чиқишини инобатга олиб, бўлажак ўйин ва “армиячилар” сафидаги Аббосбек Файзуллаев ҳақида ҳам ўз фикр-мулоҳазаларини билдириб ўтди.

- Аббос – жуда яхши йигит ва ажойиб футболчи. У билан доимий алоқадамиз. Кейинчи учрашувимиз ЦСК билан бўлади. Ўзаро учрашиш жуда қизиқарли.

Лекин бир биримизга қарши ўйнаганда, дўстлигимизни тўхтатиб турамиз.

Айни пайтда Файзуллаев ЎЗбекистоннинг энг асосий талантларидан бири ҳисобланади, - деди Рустам Ашурматов.

27 ёшли Ашурматов жорий мавсумда Россия Премьерлигасида саккизта, мамлакат кубогида олтита, жами 14 та учрашувда майдонга тушди. Рустамнинг қозонликлар билан амалдаги шартномаси 2026 йилнинг 30 июлигача давом этади.

Аббосбек Файзуллаев эса, янги мавсумда барча турнирларда 17 та учрашувда қатнашиб, рақиблар дарвозасини икки маротаба ишғол қилган ва жамоадошларига бешта голли пас узатган.

21 ёшли ҳужумкор футболчимизнинг “армиячилар” билан ҳамкорлиги 2026 йилнинг ёзигача давом этиши ва томонлар ўзаро келишган ҳолда битимни яна бир мавсумга узайтириши мумкинлиги  белгиланган.

“Рубин” ва ЦСКА ўртасидаги учрашуви Россия кубоги чорак финал босқичи доирасида 6 ноябрь куни Қозон шаҳрида бўлади.  

Ҳусанов нималар қилиб қўйдинг?! Дембеле ва Ҳакимини ағдариб ташлаган Ҳусановнинг ўйинига қандай муносабат бўлди?

 

.