Файзуллаев асосий таркибдан чиқарилдими?
- 14-феврал 2025, 17:29
- Zohir Toshxo’jayev
- 3
- Футбол
ЦСКА Россия Премьер-лигасидаги охирги чемпионлигини 2016 йили нишонлаган. Клуб раҳбарияти бир неча йилдан бери яна шоҳсупага кўтарилишга қодир жамоа шакллантиришга ҳаракат қилмоқда.
Бу борада “армиячилар” мунтазам таркибни кучайтириш ва футболчиларни маҳорат билан бошқара оладиган бош мураббий топишга алоҳида эътибор қаратиб келмоқда.
Ҳозир жамоани бошқараётган сербиялик мутахассис Марко Николич ҳам клубга ана шу мақсадда таклиф этилган.
Мураббийлик фаолиятини анча эрта – 2021 йилда бошлаган 45 ёшли мутахассис Сербиядан ташқари, Словения, Венгрия, Бирлашган Араб Амирликларида ҳам ишлаган. ЦСКА унинг Россиядаги фаолиятида иккинчи жамоа. Илгари маълум муддат “Локомотив”ни бошқарган.
Николич чемпионатда юзага келган қишки танаффусдан фойдаланиб, жамоа ўйин услубини ўзгартирди. Бу янгиланиш бевосита Аббосбек Файзуллаевнинг ўйинига таъсир қилди. Илгари олдинги чизиқда ўйнаб, қанотлардан ҳужум ташкил қилган легионеримизга янги вазифа юклатилди.
Энди Аббос бу ишни бироз ортга қайтиб, майдон ичкарисидан бошлаб, амалга ошириши талаб этилмоқда. Янги позициясини ўзлаштириш осон бўлмаяпти. Бир неча учрашувда Николич Файзуллаевни тўлиқ ўйнатаётгани йўқ. Бу жамоада асосий фигуралардан ҳисобланган ўзбек футболчисининг асосий таркибдаги ўрни мавҳум бўлиб қолгани ҳақидаги саволларни келтириб чиқарди.
Файзуллаевнинг ўзи янги позицияга мослашиши учун бироз вақт кераклигини таъкидлаган эди. 21 ёшли ҳужумкор футболчи навбатдаги интервьюсида мухлисларни қизиқтирган бу масалага ойдинлик киритди.
Sports.uz портали Аббосбек Файзуллаев берган маълумотларни ўзбекистонлик футбол ишқибозлари эътиборига етказишни маъқул топди.
- Асосий таркибдаги ўрнимни йўқотдим, дея олмайман. Йиғинлар давоми этмоқда, мураббийлар янги схемаларни синаб кўрмоқда. Мен биринчи йиғиннинг катта қисмини жароҳат туфайли – белимда оғриқ бўлгани учун ўтказиб юбордим.
Ҳозир мавсумнинг иккинчи қисмига тайёрланяпман ва охиригача курашаман.
Мен меҳнат қилавераман, лекин қарорни бош мураббий қабул қилади. Мен Николич учун гапира олмайман. Ўзим ўзимни таркибга киритолмайман. Рақобат ҳар доим бўлган ва бундан кейин ҳам бўлади.
Мен ЦСКАга келган давримда ҳам рақобат ҳозиргидан кам эмас эди. Ҳамма нарсага тайёрман. Миралем Пьянич билан ҳам, янги келган ўйинчилар билан рақобатлашишга ҳозирман, - деди Аббосбек Файзуллаев.
“Пахтакор” тарбияланувчиси бўлган Аббосбек 2023 йилнинг августида ЦСКАга кўчиб ўтган эди. Шундан бери жами 55 та учрашувда қатнашган ҳамюртимиз ўз ҳисобига саккизта гол ва йигирмата ассист ёздириб қўйган.
Файзуллаев хавотирга соляпти!
Файзуллаев Ҳусанов муҳим воқеага сабабчи бўлганини айтди!