Эхсони Паншанбе "Сўғдиёна"га ўтганидан сўнг: "Бу ерда ўйнаш мен учун қизиқарли"

Мухлисларимизга яхши таниш бўлган тожикистонлик ярим ҳимоячи Эхсони Паншанбе яқинда "Сўғдиёна" билан шартнома имзолаганидан хабарингиз бўлса керак.

Унинг охирги клуби "Истиқлол" жамоаси ҳисобланади. Шунингдек, ўз вақтида "Навбаҳор" жамоасида фаолият олиб борган ва ишқибозлар шу орқали эслаб қолишган. Эндиликда у яна чемпионатимизга қайтди ва "Сўғдиёна" шарафини ҳимоя қилади. Паншанбе илк интервьюсида қуйидагиларни айтди:

- Ўзбекистон чемпионати сиз учун янгилик эмас. "Навбаҳор" клубида ўйнагансиз, бу ерга қайтишингиз қандай ҳисларни уйғотмоқда?

-  Бу ерда ўйнаш мен учун жуда қизиқарли эди. Шу сабабли яна қайтиб келиш имконияти бўлганидан жуда хурсандман. Аввало, жамоа йигитларига илиқ кутиб олгани учун раҳмат. Мен жуда миннатдорман ва бу ерда жуда яхши жамоа бор.

- Тожикистон ва Ўзбекистон чемпионатлари ўртасидаги фарқлар ҳақида ўз фикрларингизни билмоқчи эдик. Сизнингча, бу икки лига ўйинлари ва муҳитида қандай асосий фарқлар бор?

- Чемпионатлар ўртасида фарқ бор, Ўзбекистонда барча кўрсаткичлар бўйича чемпионатимиздан бироз юқорироқ. Майдонлар, ўйин даражаси, инфратузилма – ҳаммаси яхши. Аммо Тожикистонда ҳам бу борада ўсиш бор ва бу йўналишда иш олиб борилмоқда.

- Янги мавсум олдидан "Сўғдиёна" жамоаси олдига катта мақсадлар қўймоқда. Шу масалада жамоа режаларини қандай баҳолайсиз? 

- Шундай юксак мақсадларнинг борлиги жуда яхши, бу жамоанинг жуда профессионал эканини кўрсатади. Биз эса ўзимиздан келиб чиқиб жамоамиз билан машғулотларда, ҳам ўйинларда максимал даражада ҳаракат қиламиз ва ушбу натижаларга эришамиз, Худо хоҳласа.

- Футболнинг энг муҳим қисми – муваффақият. Сизнингча, бу йўлда қайси сифат муҳимроқ: меҳнат ёки истеъдод? Ҳар икки омилни солиштириш қанчалик қийин?

- Мен шундай деб ҳисоблайман, қаттиқ меҳнат қилмасдан ҳеч нарса чиқмайди – бу менинг шахсий фикрим. Шу сабабли доим максимал даражада машқ қилиш керак, кейин эса Худо хоҳласа ҳаммаси яхши бўлади.

- Ўтган фаолиятингиз давомида сиз учун энг эсда қолган ўйин қайси? Ушбу ўйин сизга нимани ўргатган ва қайси сабоқларни берган эди?

- Осиё чемпионатидаги ўйин, унда биз Ливан ва БАА терма жамоаларига қарши ўйнаб ғалаба қозонганмиз. Нимани айта оламан – жамоага ва аввало, ўз кучингга ишониш, охиригача курашиш керак. Бу менга сабоқ бўлди: ҳар доим ишонч билан охиригача ўйнаш керак!

- Эҳсон, самимий суҳбат учун сизга катта раҳмат!

- "Сўғдиёна" мухлисларига мендан катта салом! Ҳар қандай вазиятда бизни қўллаб-қувватлаб турсинлар. Биз эса жамоамиз билан уларни хурсанд қилиш учун қўлимиздан келганини қиламиз. Ҳамма-ҳаммага катта раҳмат!