Европани зир титратаётган "коуч"лар ёхуд айни пайтдаги энг кучли мураббийлар тўртлиги

Европа яшил майдонларида футбол мавсуми тобора авжига чиқиб бормоқда. Жамоалар борган сари катта мусобақаларда финишга яқинлашиб келяпти ва табиийки, унда баъзи инсонлар ўз меҳнати ва истеъдоди эвазига қолганлардан яққол ажралиб турибди.

Барчамизга маълумки, футбол яралганидан бошлаб унда мураббийларнинг ўрни беқиёс бўлиб келган. Ҳозир ҳам Гвардиола, Клопп, Анчелотти каби мутахассислар клубида футболчилардан кўра юқори мавқега эга. Роналду ва Месси эрасида яшаган, икки даҳонинг ўйинларини кузатган мухлислар учун бу ноодатий туюлиши аниқ. Аммо ҳозир ростан вазият шундай кўриниш олган. 

Айни пайтда шундай "коуч"лар борки, улар бошқараётган клуб нафақат Европа, балки бутун дунёда алоҳида эътибор билан тилга олинмоқда. Қуйида шундай мураббийларнинг тўрттаси билан сизни батафсил таништирамиз.

4. Хави Эрнандес ("Барселона").

Европа лигасидаги МЮга учралган мағлубиятга қадар Каталониянинг "Барселона"си ҳамманинг оғзидан тушмай келаётганди. Ҳар ҳолда, юқори формада бўлиб турган ва Испанияни деярли ўзиники қилиб олган "Реал"ни сезиларли фарқ билан ортда қолдириш осон иш эмас. Бу натижалар тасодифан бўлиб қолаётгани йўқ, албатта. Бунинг асосий сабаби испаниялик собиқ афсонавий футболчиси Хави Эрнандес номи билан боғлиқ. 

Рақамларга тўхталадиган бўлсак, "кўк-анорранглилар" Ла Лиганинг 26 ўйинида ўз дарвозасидан атиги 9 та тўп олиб чиққан. Бу ҳар 3 баҳсда биттадан голга тўғри келади. Бу борада каталонияликлар Испанияда тенгсиз. Гол уришда ҳам Хави шогирдларининг натижаси чакки эмас. 49 бора рақибларни ранжитган жамоа лигада энг яхши 2-натижа эгаси саналади. 1-поғонада азалий рақиб "Реал" кетмоқда. 

Аналитик таҳлил билан шуғулланадиган мутахассислар Хавининг ярим ҳимоячилардан ўта самарали фойдаланаётганини алоҳида тилга олмоқда. Де Йонг, Бускетс, Педри ва Гавини ажойиб тарзда майдонда жойлаштираётган мутахассиснинг асосий устунлиги балансни тўғри ушлай олганида бўлмоқда. Ҳужумга ўтиш чоғида Педри ва Гави қанотларга ва Левандовски ортига ўтиб олади ва рақиб мудофаачиларининг у томондан бу томонга "чайқалишига" сабабчи бўлишади. Бу эса ўз навбатида, рақиб ҳимоясида бўшлиқлар юзага келишига таъсир ўтказади. 

Умумий қилиб олганда, Хави секин-аста "Ас-Садд"даги назарияларини "Барселона"га ҳам ўтказишга ҳаракат қилмоқда. 3 та ҳимоячи билан ҳаракатланишни бошлагани шундан далолат берса ажаб эмас. 

3. Лучано Спаллетти ("Наполи").

Италияда яққол гегемонлик қилаётган неаполликлар айнан Спаллетти қураётган футбол эвазига етакчилик қилмоқда. Тўғри, Хвича ва Осимхеннинг ўта ажойиб формада экани ҳам эътибордан четда қолмаслиги лозим. Бироқ мураббий танлаган тактика эвазига улар мана шу даражада ҳаракат қила олишяпти. Масалан, кўпчилик юқорида тилга олинган икки футболчининг бошқа клубларда ҳам шу тарзда тўп тепиб кета олишига ишонмаяпти.

Қизиғи, "Наполи" чемпионатдаги гол уриш ва ўтказиб юбориш борасидаги статистикада ҳам рақибларига "нон қолдирмаяпти". 64 та гол урган Спаллетти шогирдлари ўз дарвозасидан 16 та тўп олиб чиққан. Лига якунига ҳали 11 та тур бор. Бироқ Италияда ҳаммаси ҳал бўлганини кўпчилик жуда яхши англаб турибди. Неапол шаҳри вакиллари узоқ кутилган "Скудетто"ни бу йил қўлга киритишга ҳар сафаргисидан ҳам кўра жуда яқин келмоқда. Қандайдир мўжиза рўй бериб қолмаса, А Серия титули "Наполи"га насиб этиши деярли аниқ. 

2. Микель Артета ("Арсенал").

Чемпионлар лигасига ҳам чиқа олмай юрган, доимий тарза мемларга сабаб бўлиб юрувчи жамоани кимсан АПЛда чемпионлик учун асосий даъвогарга айлантира олган мутахассис. Ҳа, бир неча йил олдин уни фақат "Гвардиоланинг шогирди" сифатида танишарди. Ҳозир эса ўша шогирд устозидан ўтиб кетиб, жадвалда 8 очкога олдинда бормоқда. 

"Арсенал" ҳозирда жамоавий ўйин борасида нафақат Англияда, балки бутун Европада ҳам юқори ўринларда турибди. Ёш ва тезкор футболчилардан ташкил топган таркиб тажрибали Жоржиньо, порлоқ истиқболга эга Троссард каби номлар эвазига янада кучайиши шубҳасиз. Қанот ва марказда кучли рақобат вужудга келиши "тўпчилар" учун фақат ва фақат фойдали бўлади, дея оламиз.

Лондонликлар статистик кўрсаткичлар бўйича фақатгина "Манчестер Сити"дан ортда қоляпти. Бошқа клублар рақамлар борасида Артета жамоаси билан беллаша олмайди. Кўрамиз, мавсум охирида ҳам "канонирлар" АПЛ турнир жадвалининг юқорисида қолишни эплай олармикин?! Ҳар ҳолда, Европа лигаси каби муҳим мусобақа бежизга бой берилмагандир...

1. Эрик тен Хаг (МЮ).

Биринчи поғона жуда баҳсли. Аммо изоҳлаб берса бўлади. Масалан, Артета жамоасини чемпионликка етаклагунга қадар 3 йил давомида селекция ишларини олиб борди. Хави ҳам 1 йилдан кўпроқ вақт сарфлади, Спаллетти эса 2 йил олдин Неаполда иш бошлаганди. Тен Хаг жаноблари эса атиги ярим мавсум мобайнида МЮнинг яна жиддий қабул қилинишига сабабли ишларни бажара олди. Жамоавий футболни ташкиллаштирди, клуб ичида тартиб-интизом ўрнатишга эришди. Бўйин эгмас "баъзи" юлдузлар асло аяб ўтирилмаслигини ҳам кўрсатиб қўйди. Умуман олганда, клуб манфаати ҳамма нарсадан устун эканини барчага бирдек сингдириш йўлида иш олиб борди ва ҳамон шу йўналишда давом этяпти. 

Энди ўзингиз тасаввур қилинг, агар Эрик шу йўсинда Артетадек имкониятларга эга бўлиб, яна 3 йил Манчестернинг қизил тарафида бош мураббий бўлиб турса... 

 

Шоҳрух Зоиров мақоласи.