Элдор энг зўр тўпурарлигини исботлай оладими?
- 11-октябр 2020, 23:05
- Zohir Toshxo’jayev
- 0
- Футбол
Ўзбекистон миллий терма жамоасининг асосий ҳужумчисига айланган Элдор Шомуродов Тошкентда Эрон миллий терма жамоасига қарши ўтказилган учрашувда рақиб дарвозасини ишғол қилди.
Элдор мамлакатимиз бош жамоаси сафида 44-учрашувида 21-голини урди.
Маълумки, Ўзбекистон миллий терма жамоасининг энг зўр тўпурари номини эгаллаб турган Максим Шацких ҳисобида 34 та гол бор. Бу кўрсаткичга эришиш учун Максимга 60 та учрашув керак бўлган.
Энг иқтидорли ҳужумчилардан бўлган Александр Гейнрих 98 та учрашувда 32 та гол уриб, Шацкихнинг натижасига жуда яқин келганди, лекин бу кўрсаткични янгилагунича ўзи футболдан кетиб қолди.
Кучли учликдаги Миржалол Қосимов эса 66 та ўйинда рақиблар дарвозабонларини 30 марта хафа қилган.
Миржалолдан кейин жамоада плеймейкерлик қилган Сервер Жепаров энг кўп – 126 марта майдонга тушиб, рекорд ўрнатган ўйинларида 25 маротаба қайтариб бўлмас зарба йўллаган.
Элдор Шомуродов Эрон дарвозасини ишғол қилиш орқали терма жамоамиз тўпурарлари рўйхатида бешинчи ўринга кўтарилиб олди. “Женоа” ҳужумчиси йигирма йил олдин 31 та ўйинда 20 та гол урган Игорь Шквирин ва бу галги йиғинга кела олмаган терма жамоа сардори Одил Аҳмедовни ортда қолдиришга муваффақ бўлди. 103 та ўйинда 20 та гол урган Одил Аҳмедов ҳали юқори савияда ўйин кўрсатаётганини инобатга олиб, унинг тўпурарлик бўйича кўрсаткичлари янада яхшиланишига умид қилсак бўлади.
Бугунги кунда фаолиятини давом эттираётган ўйинчиларимиз орасида Игорь Сергеев тўпурарлар рўйхатини ўзгартириши мумкин. 27 ёшли ҳужумчи 50 та баҳсда 15 та аниқ зарба йўллаган ва Игорь ҳозир ҳам терма жамоага номзодлар рўйхатида ўзига бериладиган имконни кутмоқда.
Кучли ўнликдан 15 та голни ўз ҳисобига ёзиб қўйган Жаъфар Ирисметов ва муҳим учрашувларда жамоамиз ғалабасини таъминлаган 14 та гол соҳиби Улуғбек Бақоев ҳам жой олган.
Шу ўринда, Ўзбекистон миллий терма жамоасининг энг яхши тўпурари бўлиб турган Максим Шацкихнинг рекордини энг қисқа фурсатда янгилаш имконияти фақат Шомуродовда борлигини таъкидлаш керак. Статистика бўйича Элдор гол уриш учун бошқалардан кам вақт сарфламоқда.
Яна бир муҳим жиҳат шундан иборатки, Элдор Шомуродов клублардан кўра терма жамоада самаралироқ ўйин кўрсатмоқда. 25 ёшли ҳужумчимизнинг фаолиятига назар ташласак, бу яққол намоён бўлади. У “Бунёдкор” таркибида 2015-2017 йиллар давомида жами 66 та ўйинда ўз ҳисобига 18 та гол ёзиб қўйган эди. Шундан сўнг, уч йил мобайнида “Ростов”да барча турнирларда 91 та ўйинда 18 марта дарвозаларга йўл топа олди.
2015 йилдан бери миллий терма жамоа ҳужумида 44 та ўйинда 21 та гол уришга эришди. Ва сўнгги ўйинларда унинг самарадорлиги кўтарилиб бормоқда. 2022 йилги жаҳон чемпионати ва 2023 йилги Осиё кубоги қўшма саралаш турнирида терма жамоамизнинг 12 та голидан тенг ярмига муаллифлик қилди. Элдор Шомуродов Яман ва Саудия Арабистони дарвозасига бир маротабадан йўл топган бўлса, Сингапур ва Фаластинга қарши ўйинларда дубль қайд этди.
Демак, Эрон дарвозабони ҳам Элдорнинг зарбаси олдида ожиз қолганини инобатга олсак, “италиялик” ҳужумчимизнинг голли серияси давом этмоқда. Энди навбатдаги голни 12 октябрь куни сафарда Бирлашган Араб Амирликлари билан бўладиган ўртоқлик учрашувида кутиб қоламиз.