Дилшод Раҳматов: "Минимум вазифани уддаладик, мақсадимиз чемпион бўлиш"

Қувайтда футзал бўйича ўтказилаётган Осиё чемпионатида Ўзбекистон терма жамоамиз бугун гуруҳдаги охирги ўйинда Баҳрайн билан куч синашди ва рақибини йирик 6:1 ҳисобида доғда қолдириб, гуруҳда 100 фоизлик натижа қайд эта олди.

Терма жамоамиз етакчиларидан бири Дилшод Раҳматов ЎФА матбуот хизматига ўйин тўғрисидаги фикрлари билан ўртоқлашди.

“Бугунги ўйин ва ғалаба билан Ўзбекистон халқини табриклайман. Гуруҳдан чиқиб, олдимизга қўйилган минимум вазифасини уддаладик. 3 та ўйинда 3 та ғалаба. Бугунги учрашувда ёшларимиз ўзларини яхши томондан кўрсатишди. Шунинг ҳисобига катта ҳисобда ютдик.

Бизга ким рақиб бўлишига қараб мураббийларимиз қандай ўйин кўрсатишимизни айтишади. Мақсадимиз олий – чемпион бўлиш. Шунинг учун кейинги босқичдан ҳам ўтишимиз керак”, - дейди Раҳматов.