Дилшод Комилов: "Ғалабадан бошқа йўлимиз йўқ эди"

Суперлиганинг 9-турида “Қизилқум” клуби “Навбаҳор” билан беллашди.

Ниҳоят, “Қизилқум” ўз уйига қайтди ва маълум вақтдан кейин майдон чими янгиланган Навоийдаги аренасида илк ўйинини ўтказди. Стадион мухлислар билан тўлган учрашувда “Қизилқум” қийинчилик билан бўлса-да, рақибини 3:2 ҳисобида мағлубиятга учратди.

Ўйинни фаол ўтказган ва битта голга муаллифлик қилган ҳимоячи Дилшод Комилов Sports.uz учун ортда қолган ушбу баҳс борасида фикрларини айтиб ўтди.

"Мухлислар қаршисида тўп суриш ёқимли"

- “Навбаҳор”га қарши ўйин жуда юқори нотада ўтди. Учрашув ниҳоятда қизиқарли бўлди. Стадионга келган мухлислар ҳам келганига афсусланишмасдан чиройли ўйин кўриб кетишди, деб ўйлайман.

Албатта, бундай мухлислар қаршисида тўп суриш ҳар бир футболчига ёқимли. Хусусан, бизга ҳам куч берди. Анчадан бери Навоийда футбол бундай руҳда ўтмаётганди. Чунки маълум вақтдан буён ўзимизда футбол ўйнай олмаётгандик. Ниҳоят, уй ўйинларимизни ўз стадионимизда қабул қилишни бошладик. Мухлислар стадионни тўлдириб туришса ҳар учрашувда бор кучимиз билан ҳаракат қилиб, келган рақиблар билан тенгма-тенг курашиб, ғалаба қозонишга ҳаракат қиламиз.

"Бундай майдонда исталган жамоа ўз ўйинини намойиш қила олади"

- Майдон ҳолати жуда ҳам аъло даражада. Худо хоҳласа, яна бир-иккита ўйинлардан кейин бунда ҳам зўр ҳолатда бўлади, деб ўйлайман. Ҳозир ҳам исталган футболчи ва жамоа бундай майдонда ўз ўйинини намойиш қила оладиган даражада.

"Гол уриш ниятида майдонга тушгандим"

- Голимга келсак, тўғрисини айтсам, ушбу учрашувда гол уришимни кутгандим. Майдонга гол уриб жамоамнинг ғалабасига ўз ҳиссамни қўшиш ниятида тушгандим. Ниятга яраша, Худога шукр юзимиз ёруғ бўлиб, иккинчи голни урдим ва биз ғалаба қозондик.

"Навбаҳор" ҳам ютиб кетиши ҳеч гап эмасди"

- Кўрдингиз, беллашув тенг курашлар остида бўлди. “Навбаҳор” ҳам ғалаба қозониб кетиши мумкин эди. Уларда ҳам яхши имкониятлар юзага келди. Худога шукр, охирида бизга насиб қилди ва пенальтидан муҳим голни уриб, керакли уч очкони қўлга киритдик.

"Йирик ҳисобдаги мағлубиятдан кейин ютмасак ноқулай вазиятлар бўлиши мумкин эди"

- “Навбаҳор” биз кутгандек ўйин кўрсатди, голлар ҳам уришди. Бу рақиб яхши шаклланиб келаётган жамоалардан бири. Исталган рақибга қарши бемалол жанговар руҳда ўйнай олади. Ўзимизни ўйинга келсак, бу баҳсда асосан ўз ўйинимизни йўлга қўйишимиз керак эди. Чунки ундан олдинги турда “Насаф”га мағлубиятга учрадик. Ўз мухлисларимиз қаршисида, Навоийда 1,5 йилдан бери ўйнай олмаётгандик. Шу боис ушбу ўйинда стадион ишқибозлар билан тўлишини билардик. Ўз уйингизда тўп ва ўйин назоратини қўлга олмасангиз мухлислар норози бўлиши мумкин. Биз шу сабабли ҳам кўпроқ ўз ўйинимизга эътибор қаратиб, ғалаба қозонишга ҳаракат қилдик. Олдимизда ғалабадан бошқа йўлимиз ҳам йўқ эди. Йирик ҳисобдаги мағлубиятдан кейин уйимизда ютмасак ҳар хил ноқулай вазиятлар бўлиши мумкин. Шунинг учун бор кучимиз билан курашдик. Машғулотларда ҳам жиддий ишладик. Юқори ўринларга курашиш учун “Навбаҳор”ни ютганимиз яхши қадам бўлди, деб ўйлайман. Кейинги турларда ҳам яхши ўйин кўрсатиб, ғалабалар қозониб, мухлисларимизни хурсанд қилиш ниятидамиз.