Диаш: “Реал”га қарши ким тушишини ҳеч ким билмайди. Бизда Уокернинг ўрнига етарлича ҳимоячилар бор”

“Манчестер Сити” ҳимоячиси Рубен Диаш “Реал Мадрид”га қарши плей-офф баҳсидан аввал Хосеп Гвардиола билан бирга, матбуот анжуманида иштирок этди. Португалиялик ҳимоячи бўлажак беллашув, собиқ жамоадоши ҳисобланган Кайл Уокер ва “Сити”нинг ҳозирги ҳолати ҳақида гапирди. 
 
"Мен “Олтин тўп”ни Родри қўлга киритганидан сўнг “Реал Мадрид” томонидан ҳурматсизлик қилингани ҳақида бир сония ҳам ўйламаганман. Мен шунчаки хурсанд бўлдим ва фахрланиб турдим. 

Эртанги тўқнашувда ҳимояда қанчалик мустаҳкам бўлсак, ўйинимиз шунчалик яхшиланади. 

Шу билан бирга, мен Эрлинг Ҳоланд ва Килиан Мбаппе ўртасидаги қарама-қаршиликни ҳис қилмаётганимни таъкидламоқчиман. Бу “Манчестер Сити” ва “Реал Мадрид” клублари ўртасидаги муҳим баҳс ҳисобланади. Иккала жамоада ҳам юлдуз футболчилар етарлича. 

Кайл Уокер ҳаммамиз ишонадиган футболчилардан бири эди. Афсуски, ҳозирги кунда эса у бизнинг сафимизда эмас. Демак, бошқа бир футболчи етакчиликни ўз зиммасига олиши керак. Албатта, бундай вазифани бажара оладиган етакчи футболчиларимиз бор. 

Ҳозирги турнир жадвалига назар солсак, жуда оғирлигини кўришимиз мумкин. Мен шунчаки бу жараённинг бир қисми бўлишни ва жамоа билан бирга, ҳаракат қилишни истайман. 

Биз “қироллик клуби”га қарши ғалаба қозониш учун қанчалик яхши бўлишимиз кераклигини тушунамиз. Ўтган мавсум устунлик қилган эдик, лекин керакли голни ура олмаганмиз. Эртанги беллашувда эса бундай хатоларни қилмасликка ҳаракат қиламиз. 

“Қаймоқранглилар”нинг ҳимоядаги йўқотишлари туфайли бўшашимиз - энг катта хатодир. Биз уларнинг даражасига чиқишимиз керак, шунда балки бу ҳолатдан фойдалана олармиз.

Шуни таъкидлашим керак, “Реал”га қарши ким майдонга тушишини билмаймиз, лекин Уокернинг ўрнини босадиган вариантларимиз бор. Муҳими – жамоавий ҳаракат, биз рақиб жамоанинг алоҳида футболчисига эътибор қаратмаймиз” – деди "шаҳарликлар"нинг асосий ҳимоячиларидан бири. 
 
Эслатиб ўтамиз, миллий терма жамоамиз ёш ҳимоячиси Абдуқодир Ҳусанов эртанги учрашув учун қайдномага киритилган. “Манчестер Сити” таркибида Мадриднинг “Реал” клубига қарши дебют учрашувини ўтказиши мумкин.