Чемпион футболчимизни Россия клуби олиб кетмоқчи
- 4-январ 2025, 19:19
- Zohir Toshxo’jayev
- 0
- Футбол
Қишки трансферлар даврида келажаги бўйича бир қарорга келиши талаб этиладиган ўзбек футболчиларидан бири Иброҳимхалил Йўлдошевдир.
23 ёшли чап қанот ҳимоячиси учун 2024 йил муваффақиятли якунланди. Мавсумни Қозоғистон Премьер-лигасида ўтказган Иброҳимхалил “Қайрат”нинг мамлакат чемпиони бўлишига муносиб ҳисса қўшди.
Бир йил муқаддам чемпионлик учун курашишни мақсад қилган “Қайрат” таркибни кучайтириш мақсадида Россия Премьер-лигасида “Нижний Ногород” жамоасида ўйин амалиётисиз қолиб кетаётган Иброҳимхалил Йўлдошевни бир йилга ижарага олганди.
Охир-оқибат Қозоғистоннинг энг машҳур клуби чемпионликка эришди. Иброҳимхалил “Қайрат” таркибида барча мусобақаларда 23 та учрашувда иштирок этиб, ҳимоядаги вазифаларини уддалашдан ташқари, иккита гол ва тўртта ассист муаллифи ҳам бўлди.
Йўлдошевнинг қозоқ клуби билан ижара шартномаси 2024 йилнинг 31 декабрь куни якунланди ва 23 ёшли ҳимоячимиз ҳуқуқий жиҳатдан яна “Нижний Новгород” жамоаси ўйинчиси ҳисобланади.
Футболга ихтисослашган манбаларнинг маълум қилишича, “Қайрат” ўз ўйинлари билан мухлису мутахассислар ишончини оқлаган легионеримизни ўз сафида олиб қолиш учун Йўлдошев билан музокара ўтказмоқда. Томонлар яна икки йил давомида ҳамкорлик қилишни режалаштирган.
Шунингдек, Иброҳимхалил Йўлдошевда Россия Премьер-лигасига қайтиш варианти ҳам чиқди. Юқори дивизионда қолиш учун курашаётган “Ахмат” клуби ҳимоя чизиғини ўзбек легионери ёрдамида кучайтиришни режа қилган.
Маълумки, Йўлдошев Россия Премьер-лигасида ҳам етарли даражада тажриба тўплаган. 2021 йили Иброҳимхалил “Пахтакор”дан “Нижний Новгород”га трансфер қилинганидан кейин бу жамоанинг асосий ўйинчиларидан бирига айланганди. Бироқ кейинчалик жамоа бош мураббийлигига тайинланган Сергей Юран Йўлдошевни захирага михлаб қўйди.
Умумий ҳисобда, легионеримиз нижний новгородликлар сафида 63 та учрашувда қатнашиб, ҳимоядаги вазифаларини бажариш билан бирга учта гол ва бешта ассист муаллифи ҳам бўлган эди.
Буёғига Иброҳимхалил Йўлдошевни қайси клуб ўз сафига қўшиб олишидан қатъи назар “Нижний Новгород”га маълум миқдорда бадал пули тўлашига тўғри келади. Чунки ҳамюртимизнинг бу клуб билан 2025 йилнинг 30 июнига қадар давом этадиган шартномаси бор.
Transfermarkt портали 2024 йилнинг ноябрида Қозоғистон Премьер-лигасида ўйнаган футболчиларнинг рейтингини янгилаганида Иброҳимхалил Йўлдошевнинг трансфер суммасини 900 минг еврога кўтарган эди.
Иброҳимхалил Йўлдошев клублар миқёсидаги фаолияти давомида “Пахтакор”, “Бунёдкор”, “Нижний Новгород” ҳамда “Қайрат” жамоалари сафида жами 126 та учрашув ўтказиб, рақиблар дарвозасига саккизта гол урган ва жамоадашларига ўнта голли пас узатган.
Демак, 23 ёшли легионеримиз атрофидаги вазиятни кузатишда давом этамиз. Тез орада Иброҳамхалил қайси жамоада ўйнашига ойдинлик киритилади.
Харидор кўп: Шомуродов қайси жамоага ўтади?
Шомуродов қаерда бўлиши кераклигини кўрсатиб қўйди! Элдорнинг 5 дақиқалик ўйини қандай баҳоланди?