Бунақаси бўлмаган: Ҳусанов “учди”!
- 3-январ 2025, 13:10
- Zohir Toshxo’jayev
- 0
- Футбол
Франция футболида жамоаларнинг энг яхши ўйинчиларини аниқлаш мухлислар ўртасида сўровномалар ўтказиш орқали амалга оширилиши аънанага айланган.
Декабрь ойи якунларига кўра, Франциянинг нуфузли нашрлари “Ланс”нинг энг яхши ўйинчисини аниқлаш мақсадида навбатдаги сўровномани ташкил этиб келяпти. Аҳамиятлиси шундаки, кейинги пайтдаги ҳар қандай танлов ва сўровномаларда Ҳусановнинг рейтинги юқорига қараб "учмоқда".
Sports.uz портали ушбу жараён ҳақида маълумот беради.
LE11HDF.FR сайти:
Сайтимиз мавсум давомида сиз мухлисларни “Ланс”нинг ҳар ойдаги энг яхши ўйинчисини аниқлашга чақириб келади.
Абдуқодир Ҳусанов деярли ҳар ҳафта якунига кўра, ҳайратланган мухлисларнинг мақтовларини эшитишига тўғри келяпти. Шу боис, бу футболчи “Ланс”да ойнинг энг яхши ўйинчиси бўлиши одат тусига кириб қолди.
Қишки трансферлар ойнаси даврида жамоани тарк этиши эҳтимоли катта бўлган 20 ёшли ҳимоячи декабрь ойини ҳам юқори савияда ўтказди. “Ланс” ой давомида “Монпелье”, “Осер” ёки “Пари Сен-Жермен” бўладими, бу рақибларга қарши беллашувларда мухлислар Ҳусановни учрашувнинг энг яхши ўйинчиси, деб топди.
Учрашувлардаги курашувчанлик, тезкорлик, ҳимоя чизиғини назорат қилиш, тўпга эга қилиш қобилияти “Ланс” учун муҳим аҳамият касб этмоқда ва Абдуқодирни сайтимиз ўқувчилари томонидан декабрь ойининг энг яхши футболчиси сифатида эътироф этилишига асос бўлди.
Сўровнома натижалари билан танишинг:
Абдуқодир Ҳусанов – 78 фоиз
Пшемислав Франковски – 16 фоиз
М'Бала Нзола – 3 фоиз.
Таъкидлаш жоизки, Абдуқодир Ҳусановнинг жамоанинг муайян ой давомида энг яхши ўйинчи бўлиши яхши аънанага айланиб бўлган. Мухлислар унинг хизматларини эътироф этмоқда.
Мавсумнинг биринчи қисми олти ой давом этган бўлса, уларнинг тенг ярмида ланслик ишқибозлар айнан ўзбек легионерига энг кўп овоз бериб келган.
LE11HDF.FR сайти сўровномасининг аввалги ойлардаги энг яхши футболчилари рўйхати қуйидадагича кўриниш олди:
Август : Кевин Дансо
Сентябрь : Абдуқодир Ҳусанов.
Октябрь : Абдуқодир Ҳусанов.
Ноябрь : Адриен Томассон
Декабрь : Абдуқодир Ҳусанов.
Абдуқодир Ҳусанов жорий мавсумда Франция чемпионати, мамлакат кубоги ва Европа Лигасида жами 16 та учрашувда иштирок этиб, ҳимоядаги вазифаларини бажаришдан ташқари, битта ассист ҳам қайд этди. 20 ёшли футболчи Transfermarkt портали томонидан 12 миллион еврога баҳоланмоқда ва бу кўрсаткич бўйича Марказий Осиёнинг энг қимматбаҳо ўйинчиси ҳисобланади.