Бу мағлубият Файзуллаев учун аламли бўлди
- 23-май 2024, 21:22
- Zohir Toshxo’jayev
- 0
- Футбол
Аббосбек Файзуллаев учун жорий мавсум энг эсда қоларлиси бўлди. “Пахтакор”дан ЦСКАга кўчиб ўтган иқтидорли футболчимиз легионер сифатида мухлису мутахассислар эътибори ва эътирофини қозонди.
20 ёшли ҳамюртимиз Россия Премьер-лигасининг жорий мавсумдаги энг яхши ўйинчиси ва асосий кашфиёти номинациялари бўйича ғолибликка даъвогарлик қилмоқда.
.jpg)
ЦСКА сафида Аббосбек бирор совринни қўлга кирита олмади. “Армиячилар” Россия кубоги финалида “Зенит”дан мағлубиятга учраб, Суперфинал йўлланмасидан қуруқ қолди.
Файзуллаев журналистларга берган интервьюсида бу ҳолатга алоҳида эътибор қаратди.
Sports.uz портали ушбу суҳбатни ўзбекистонлик футбол ишқибозлари эътиборига ҳавола этади.
— ЦСКАдаги мавсумни бир сўз билан изоҳлаб бер...
— Ўртача. Биз Россия кубогининг Суперфиналига чиқа олмадик, лекин мавсумни соврин билан якунлашни истаган эдик. “Зенит”га пенальтилар сериясидан ютқазиганимиз аламли бўлди. Бу лоторея эди.
— Бу мавсум шахсан сен учун қандай бўлди?
— Шахсан ўзимни айтсам, яхши бўлди. Йил давомида ўсишга эришдим. Ўсиш ўйин бобида ҳам, жисмоний ва умумий тарафдан ҳам бўлди. Кейин ҳам мавсумдан мавсумга ривожланиб боришни хоҳлайман.
— Чемпионатнинг кузги қисмини юқори даражада ўтказдинг, баҳорда май ойигача гол+пас тизимида 1+1 кўрсаткичини қайд этдинг. Сабаба нимада?
— ЦСКАга энди келган вақтимда рақиблар менга ортиқча эътибор қаратмас эди. Ўзимни кўрсатганимдан кейин менга нисбатан шиддатли ва тажовузкор ўйнай бошлашди, ҳаракат қилишга кам имкон беришди. Мана шу томондан бироз қийинчилик бўлди.
Аббосбек Файзуллаев жорий мавсумда Россия Премьер-лигасида 21 та ўйинда ўз ҳисобига тўртта гол ва еттита ассист ёздириб қўйди. Россия кубоги доирасида 10 та учрашувда битта гол ва учта голли пас муаллифи бўлди.
Легионеримиз ЦСКА сафида чемпионатда “Ростов”, “Динамо Москва”, “Факел” ва “Рубин”, кубок мусобақасида “Балтика” жамоаси дарвозасини ишғол қилди.