Бу ишда Ҳусановга тенг келадигани йўқ!
- 7-феврал 2025, 00:04
- Ali Ahmadxo’jayev
- 0
- Футбол
Беларусь футболи вакиллари “Манчестер Сити” ўйинчисига айланган Абдуқодир Ҳусанов профессионал фаолиятини ушбу мамлакат олий лигасида бошлаганини фахр билан тилга олади.
2022 йили “Энергетик-БГУ” билан биринчи профессионал шартномасини тузган ўзбек футболчиси орадан бир йил ўтиб, Франциянинг ўша пайтдаги вице-чемпиони “Ланс”га кўчиб ўтган эди.
Бу Беларусь футболи тарихида маҳаллий жамоанинг “топ-5” лигасига тўғридан-тўғри амалга оширган биринчи трансфер бўлди.
Яқинда Беларуснинг “Витебск” жамоаси сафига қўшилган беларуслик футболчи Ярослав Макушинский Ўзбекистон чемпионатида олий дивизионга йўл олган “Бухоро” жамоаси шарафини ҳимоя қилгани, ўзбек футболи ва “Энергетик-БГУ”да Абдуқодир Ҳусанов билан бирга ўйнагани ҳақида интервью берди.
- Агар футбол ҳақида гапирадиган бўлсак, Ўзбекистон чемпионатининг биринчи лигаси ҳам кучли турнир ҳисобланади. Ҳамма ташкил ишлар яхши даражада бажарилган. Стадионга келадиган мухлислар сони ҳам бизникидан кўп. Улар ўз жамоасини фаол қўллаб-қувватлаб туради.
- Футболнинг умумий даражасини солиштирсак, қайси мамлакат устун?
- Ўзбекистон чемпионатидаги мавқе жиҳатидан иккинчи лигада саккизта жамоа иштирок этади. “Бухоро” унда иккинчи ўринни эгаллади. Бироқ мусобақа жадвали жуда зич кўриниш олди.
Деярли барча клубларнинг даражаси ва савияси бир-бирига яқин. Рақобат кучли, ҳамма юқори дивизионга чиқиш учун курашди, оддий ўйинлар бўлгани йўқ ҳисоб.
Ўйлашимча, мен ўйнаган “Бухоро”нинг Беларусь олий лигасида совринли ўринлар учун бўлмаса-да, бешинчи ўринга даъвогарлик қилишга кучи етарди.
- Абдуқодир Ҳусанов ҳақида нима дея оласан?
- У “Энергетик-БГУ”га келган дастлабки йилда жамоа учун ўйнай олмасди. Ҳусановни асосан ўртоқлик учрашувларида майдонга туширишарди. У жамоа билан фақат машғулотларда бирга эди. Лекин ўшандаёқ жуда қаттиқ шуғулланганини алоҳида эътироф этиш керак. Меҳнаткашлик ва ишчанлик борасида унга етадигани йўқ эди.
Машғулотларда юз фоиз бор кучини сарфларди.
Умуман олганда эса, жуда камтарин йигит. Ўшанда у анча ёш эди, кўп гапирмасди, лекин ҳеч қачон мулоқотдан қочмаган.
Эслатиб ўтамиз, Абдуқодир Ҳусанов футбол сир-асрорларини “Бунёдкор” академиясида ўрганган. Лекин ўсмирлигидаёқ Беларусга кетиб, “Энергетик-БГУ” жамоаси сафида шуғулланиб юрган. 18 ёшга тўлиши билан биринчи профессионал шартномасини тузди.
Кейинчалик “Ланс”га кўчиб ўтган ҳамюртимизнинг истъедоди Европага танилди. Легионеримиз учун “топ-5” лигалар грандлари ўртасидаги курашда “Манчестер Сити” ғолиб чиқди. Англия чемпионлари ўзбек футболчиси учун францияликларга жами 50 миллион евро тўлайдиган бўлди.
Абдуқодир Ҳусанов Франция ва Англия чемпионатлари олий дивизионида иштирок этган биринчи ва ҳозирча ягона футболчи ҳисобланади.