Бош мураббий легионеримизни танқид қилди!

Қозоғистон Премьер-Лигасида “Қайрат” шарафини ҳимоя қилаётган чап қанот ҳимоячиси Иброҳимхалил Йўлдошев ўйинида пасайиш кузатилаётганга ўхшайди.

Бу футболчини Сречко Катанец анчадан бери миллий терма жамоага чақирмай қўйди. Легионеримизнинг трансфер ҳуқуқига эгалик қилувчи Россиянинг  “Нижний Новгород” жамоаси Иброҳимхалилни “Қайрат”га ижарага бериб юборди.

Ҳамюртимиз Қозоғистон клубидаги фаолиятини яхши бошлаган бўлса-да, охирига келиб танқидга учради.

Гап шундаки, “Қайрат” ўз майдонида Россиянинг кўп карра чемпиони “Зенит” билан ўртоқлик учрашуви ўткзиб, еттита гол урилган баҳсда 3:4 ҳисобида мағлуб бўлди.

“Қайрат”нинг янги бош мураббийи Рафаэль Уразбахтин кейинги пайтда ўзбекистонлик легионер муваффақиятсиз ўйнаётганини маълум қилди.

Йўлдошев ўйин охирига бориб чарчаб қолди. Уни эртароқ алмаштиришни режа қилгандик, лекин бунга улгурмадик. Биласизми, бу ерда гап жисмоний тайёргарликда ҳам эмас.

Балки унга кўп хато қилаётгани ва  шу боис жуда кўп ҳаракат қилишига тўғри келаётгани таъсир ўтказгандир. Хатолар сабаб ўйинчи жуда кўп керак бўлмаган ишларни амалга оширяпти, - деди Рафаэль Уразбахтин.

“Зенит”га қарши ўтказилган учрашувда Иброҳимхалил Йўлдошев бошланғич таркибда майдонга тушди. 23 ёшли футболчимиз ўйиннинг 76-дақиқасида ўрнини Глеб Валгушевга бўшатиб беришига тўғри келди.

Иброҳимхалил Йўлдошев “Пахтакор” тарбияланувчиси ҳисобланади. Ўзбекистон Суперлигасида “шерлар” таркибидан ташқари бир мавсум “Бунёдкор”да ҳам тўп тепган.

Бутун чап қанот бўйлаб ўйнайдиган футболчи 2021 йили Россия Премьер-лигаси вакили “Нижний Новгород” билан шартнома имзолаб, илк бор легионерга айланди. Йўлдошев дастлабки мавсумларда “Нижний Новгород”нинг асосий ўйинчиларидан бўлди. Бироқ кейинчалик Сергей Юран бош мураббий бўлгач, ўзбек футболчиси захирага ўтириб қолди.

Бунинг оқибатида Иброҳимхалил жорий йилнинг бошида “Қайрат”га ижарага кетишига тўғри келди. Унинг қозоқ клуби билан ижара шартномаси шу йил охиригача давом этади. “Қайрат”да футболчини тўлиқ трансфер қилиш ҳуқуқи бор.

Легионеримизнинг ўзи эса, яқинда берган интервьюсида фаолиятини бошқа лигада давом эттириш истаги борлигини яширмади.

- “Қайрат” билан Қозоғистон чемпиони бўлмоқчиман. Кейинги режаларни ҳали агентим билан маслаҳат қилганим йўқ.

Ўзимга қолса, кучимни Саудия Арабистони чемпионатида синаб кўришни хоҳлайман. Яхши кўрган жамоам ҳақида гапирсам, болалигимдан “Барселона”га мухлислик қиламан, - деган эди Иброҳимхалил Йўлдошев.

Дарҳақиқат, “Қайрат” миллий чемпионатда 18 та учрашувда 32 очко жамғарган ҳолда мусобақа жадвалида биринчи ўринда қайд этилган. Бу жамоа навбатдаги учрашувни 21 сентябрь куни ўз майдонида “Қайсар”га қарши ўтказади.

Иброҳимхалил “Қайрат”га кўчиб ўтганидан бери барча турнирларда 16 маротаба майдонга тушиб, иккитадан гол ва ассист муаллифи бўлди.

Отабек Шукуровнинг кетиши фойда келтирди!

Ҳусанов атрофида катта ўзгаришлар бўлди!