Бўлди, энди терма жамоада ўйнамайман!

Швейцариялик машҳур футболчи Жердан Шакири халқаро фаолиятини якунлаганини ва терма жамоа сафида бошқа майдонга тушмаслигини эълон қилди.

- Еттита катта турнир, кўплаб голлар, 14 йил Швейцария жамоаси билан бирга бўлиш ва унутилмас онлар. Терма жамоа билан хайрлашиш вақти келди. Мен билан ёрқин хотиралар қолади, ҳаммага раҳмат айтаман, - деб ёзди 32 ёшли футболчи.

Шакири Германиядаги Европа чемпионатининг гуруҳ босқичи иккинчи турида Шотландия дарвозасини ишғол қилди. Бу орқали у Европа ва жаҳон чемпионатлари тарихида камида бештадан гол урган футболчилар еттилигига кирди.

Жердар “Базель” жамоаси тарбияланувчиси ҳисобланади. Клублар миқёсидаги фаолиятида “Бавария”, “Интер”, “Сток Сити”, “Ливерпуль”, “Лион” каби жамоалар шарафини ҳимоя қилган. 2022 йилнинг бошидан бери АҚШда “Чикаго Файр” сафида тўп тепмоқда.

Шакири Швейцария терма жамоасидаги фаолияти давомида 125 та учрашувда иштирок этиб, 32 та тўп киритган.