Бизда ўйнасанг, маошинг учдан бирига қисқаради!
- 29-октябр 2025, 23:21
- Zohir Toshxo’jayev
- 0
- Футбол
“Бавария” раҳбарияти 2017 йилдан бери жамоа шарафини ҳимоя қилиб келаётган Серж Гнабрини муайян шартлар асосида клубда олиб қолишни режалаштирмоқда.
30 ёшли футболчининг амалдаги шартномаси жорий мавсум охирида якунига етади ва томонлар ҳамкорлик борасида бир тўхтамга келиши лозим.
Гнабрининг ўзи муҳитни ўзгартирмоқчи эмас ва Мюнхен суперклубида қолишни истайди. Таниқли журналистлардан Тоби Альтшеффл ва Кристиан Фальк маълумотларига кўра, мюнхенликлар Гнабрини жамоада сақлаб қолишга рози, аммо бунинг учун футболчи янги шартнома бўйича маоши ҳозиргисига нисбатан тахминан учдан бир қисмга камайтирилиши керак.
Агар ўйинчи шунга кўнса, унга 2028 йилнинг 30 июнигача давом этадиган битим берилади.
Серж Гнабри Германиянинг бир неча футбол академияларида хусусан, “Штутгарт” ёшлар жамоасида таҳсил олган. 2011 йили Англиянинг “Арсенал” клуби ёшлар жамоасига кўчиб ўтди.
“Арсенал”нинг биринчи жамоасидан муқим жой ололмаган ҳужумкор футболчи кейинчалик “Вест Бромвич”, “Вердер”, “Хоффенхайм”да ўйнаб, 2017 йили “Бавария”га келди.