"Биз ҳам сифатли контент тарафдоримиз" - "Ёшлар" телеканали Чемпионлар лигаси ўйини вақтида содир бўлган узилиш ҳақида

Кеча ЕЧЛ 1-тури доирасидаги "Динамо" Загреб - "Челси" учрашуви МТРК таркибидаги "Ёшлар" телеканали орқали эфирга узатилди.

Бугун телеканал "Телеграм"даги саҳифаси орқали жараён давомида юзага келган муаммо ҳақида тушунтириш бериб ўтди.

"6 сентябрь куни “Yoshlar” телеканали орқали эфирга узатилган “Динамо Загреб” ва “Челси” жамоалари ўртасидаги футбол ўйини давомида қисқа узилишлар содир бўлди. Трансляция сигналида бўлган узилишдан сўнг кадр бир нуқтада қотиб қолди ва автоматик тарзда захира (резерв) кадрга ўтиб кетилди. Ушбу вазият томоша учун ноқулайлик келтириб чиқарди. Қисқа узилишдан сўнг ўйин шарҳловчиси вазиятга изоҳ берди ва ноқулайлик учун узр сўради.

Шу кунларда футбол оламида параллель тарзда бўлиб ўтаётган қизиқарли баҳсларни бир вақтда бир нечта телеканаллар орқали жонли тақдим этишдан мақсад футбол муҳлисларини хурсанд қилиш. Узилишлар сабаб юзага келган ноқулайлик бизни ҳам ранжитади. Биз ҳам сифатли контент тарафдоримиз.

Шу ўринда, телеканалларда футбол трансляциялари учун маҳоратли ижодкорлардан ташкил топган катта жамоа жалб қилинган. Нафақат ўйин, балки ўйин олди ёритиш ҳам кучайтирилган. Томошабин олдидаги масъулиятни тўғри тушунган ҳолда футбол баҳслари намойишларини юқори даражада эфирга узатиш учун тинимсиз ҳаракатдамиз!

Томошабинлар томонидан етиб келадиган ҳар бир фикр ва таклиф биз учун қадрли. Ижтимоий тармоқлардаги расмий саҳифаларимиз орқали фикр ва мулоҳазаларни қабул қилишга тайёрмиз!"