"Биринчи бўлиб гол уриб олсак осонроқ бўлади, "Пахтакор" устидан ғалаба доимо ёқимли" - Анвар Ҳожимирзаев

“Динамо” клуби Суперлиганинг 3-турида Тошкентда “Пахтакор”га қарши бўлиб ўтган учрашувда ягона гол эвазига жуда муҳим ғалабани қўлга киритди.

Учрашув қаҳрамони Анвар Ҳожимирзаев бўлди. У ҳал қилувчи ягона гол муаллифи бўлди ва натижада “Динамо” “Пахтакор” устидан жуда қимматли ғалабага эришди.

Ҳожимирзаев Sports.uz сайтига ўйин ҳақида интервью берди.

- Рости, кўпчилик “Динамо”ни Тошкентда “Пахтакор”ни мағлуб этишини кутмаганди. Ғалабага қанчалик ишонгандингиз ёки дуранг ҳам хурсанд қилармиди?

- Биз ҳамма ўйинга фақат ғалаба учун чиқамиз. Қолгани Аллоҳдан. “Пахтакор” устидан Тошкентда ғалаба қозониш жуда ёқимли, албатта.

- Учрашув тўғрисида фикрингиз қандай? “Пахтакор” сиз кутган ўйинни кўрсатдими ёки...

- Курашга бой қизиқарли ўйин бўлди, деб ўйлайман. “Пахтакор” мамлакатимизни кучли жамоаларидан бири. Жамоадошларим бу учрашувда ғалабага лойиқ ўйин кўрсатишди.

- Наманганда охирги дақиқада пенальтидан гол ура олмагандингиз. Ўшанда бироз кайфиятингизга таъсир қилганди, бу сафар эса ўйин қаҳрамонига айландингиз. Бу борада нима дея оласиз?

- Тўғри, Наманганда омадим келмади. Бу футбол. Ҳамма нарса бўлиши мумкин. Барчаси Худодан. Бу сафар эса жамоамиз ғалабасига ҳиссамни қўшганимдан хурсандман.

- “Динамо” учта ўйинда ҳам дарвозаси дахлсизлигини сақлаб келяпти. Аввало, гол ўтказиб юбормаслик муҳимми ёки гол уришми?

- Орқа чизиқдагилар аъло даражада ҳаракат қилишмоқда, кўз тегмасин. Фикримча, биринчи бўлиб гол уриб олсак, осонроқ бўлади, деб ўйлайман.

- “Динамо” бу йил қайси ўринни кўзлаяпти?

- Худо хоҳласа, совринли ўринларга ҳаракат қиламиз.

- Кейинги тур ОКМК билан ўтади. “Пахтакор”дан кўра оғир кечади, деб ўйлайсизми?

- Ҳамма учрашувлар ўзига яраша қийин ўтади. Албатта, навбатдагиси ҳам осон кечмаслиги аниқ.

- Ўтган йили жамоанинг энг яхши футболиси бўлдингиз, Суперлигада ҳам алоҳида эътироф этилдингиз. Бу янги мавсумда сизга мотивация беряптими ёки босимми?

- Мотивация десак тўғри бўлса керак. Чунки янада кўпроқ хоҳиш бор. Худодан сўраймиз ва ҳаракатдан тўхтамайман.