Бир шаҳарнинг икки гранди янги истеъдодни талашяпти

Лондоннинг икки клуби – “Тоттенхэм Хотспур” ва “Челси” Фисник Асллани трансфери учун ўзаро рақобатга киришишга тайёр. 23 ёшли ҳужумчи Бундеслиганинг бу мавсумида жуда тез муваффакиятга эришиб, қисқа вақт ичида захира ўйинчисидан жамоанинг етакчи футболчиларидан бирига айланди.

Германия матбуотида қайд этилишича, “Тоттенхэм” ва “Челси” мутасаддилари “Хоффенхайм” ҳужумчисини ёзги трансферлар вақтида амалга ошириш масаласини кўриб чиқмоқда.

Кейинги пайтда Асллани Германия футболида энг кўп муҳокама қилинаётган ўйинчилардан бири ҳисобланади. Экспертларнинг таъкидлашича, Аслланининг жисмоний кучга асосланган, юқори прессингга мос ўйин услуби Англия чемпионатига жуда мос тушади.

Бироқ бу фақат Лондон клублари ўртасидаги рақобат эмас, Бундеслиганинг энг қудратли клуби “Бавария” ҳам ҳужумчи атрофидаги вазиятни диққат билан кузатмоқда. Ҳозирча аниқ таклифлар йўқ, лекин даъвогарлар кўпайиб бораётгани сабабли “Хоффенхайм” ўйинчисининг нархини оширган.

Европа топ-клублари Аслланини нега кузатувга олганини  ҳужумчининг натижалари яққол кўрсатади. У Бундеслигада 25 ўйинда 8 та гол ва 5 та голли узатма амалга ошириб, жамоасининг иккинчи энг яхши тўпурари бўлиб турибди.

Шу билан бирга, у фақат голлар билан чекланиб қолмади, 57 марта дарвозага аниқ зарба берган ва 170 марта яккакурашда ғалаба қозонган. Унинг ҳужум чизиғида агрессив ўйнаб, бир вақтнинг ўзида юқори техник маҳоратни сақлаб қолиши мутахассислар эътиборини тортмоқда.

Майдондан ташқарида ҳам у катта қарорлар қабул қила олишини кўрсатган. Берлинда косоволик муҳожирлар оиласида туғилган футболчи аввал Германия ёшлар терма жамоаларида ўйнаган, кейин эса Жаҳон чемпионати плей-офф босқичи олдидан Косово миллий терма жамоасини танлашга қарор қилган.

- 21 ёшгача терма жамоага қўшилишдан олдин юрагимга яқин қарор қабул қилдим. Ички ҳиссиётим Косовони танлашим кераклигини айтди. Мен ватанимга жуда боғланиб қолганман ва ҳар ёз у ерга бораман, - деди Фисник Асллани.

Фисникнинг чўққига чиқиш йўли осон бўлмаган. 2021-2022 йилги мавсумда тиззасидан оғир жароҳат олгани ва кейинчалик яллиғланиш сабабли у деярли фаолиятини тугатиш хавфига дуч келган эди.

Шунга қарамай, ҳозир у ажойиб мавсум ўтказиб, Европанинг энг талабгир ҳужумчиларидан бирига айланди ва энг катта клубларнинг диққат марказида турибди.