Белбоғли кураш бўйича Ўзбекистон чемпионати ўтказилмоқда

Бугун 20 июль куни Бухоро вилоятининг Ғиждувон туманидаги  спорт мактабида белбоғли кураш бўйича 2007-2008 йилларда туғилган ўғил болалар ва қизлар ўртасида белбоғли кураш бўйича Ўзбекистон чемпионатига старт бошланди.
Ўзбекистон Республикаси Спорт вазирлиги ҳамда Ўзбекистон белбоғли кураш федерациясининг йиллик тақвим-режасидаги мазкур мамлакат чемпионатида Қорақалпоғистон Республикаси, Тошкент шаҳри ва барча вилоятлардан 270 нафардан ортиқ спортчилар иштирок этмоқда. 
Мусобақада ўғил болалар эркин ва классик йўналишларда ўн учта вазн тоифаларида, қизлар эса эркин йўналишда саккизта вазн тоифасига  куч синашишмоқда. Мусобақа регламентига кўра, бугун чемпионатнинг тантанали очилиш маросими ҳам ташкил этилди. Очилиш маросимда Ўзбекистон белбоғли кураш федерацияси раиси Равшан Дастиров, Бухоро вилояти прокурори Улуғбек Ҳамдамов, Бухоро вилояти Ички ишлар бошқармаси бошлиғи Икромжон Турсунов, вилоят спорт бошқармаси бошлиғи Ўткир Нажмиддиновлар иштирок этди. Беллашувлар 22 июлгача давом этади.