Бахтиёр Ашурматов: "Қувондиқ Рўзиевнинг ўрнини боса оладиган футболчи топа олмадик, Дилшод Раҳматуллаевга улгурмай қолдик"

Coca Cola Суперлига 4-тур доирасидаги "Қўқон-1912" – "Бунёдкор" учрашувидан кейинги матбуот анжуманининг иккинчи қисмида "Қўқон-1912"  жамоаси бош мураббийи Бахтиёр Ашурматов  иштирок этди.

- Бугунги ўйинда иккита жиҳат жуда ранжитган бўлса, иккита вазият қайсидир маънода хурсанд қилди. Бизга ёқмаган ҳолатларга келсак, биринчиси ўз майдонимизда катта устунликка эга бўлган ўйинимизда қимматли очколарни йўқотганимиз бўлса, иккинчиси, бизни қўллаб турган мухлисларимиз гол кўрмагани бўлди.

Қувонтирган жиҳатлар эса, “Бунёдкор”дек жамоалар Қўқонда дуранг қайд этганидан хурсанд бўляпти. Жамоамиз ҳозир ҳар қандай рақибни  ўзини ҳурмат қилишга мажбур эта олгани хурсанд қилди. Иккинчиси, футболчиларим ўйин охиригача ғалаба учун борини бериб ҳаракат қилди. Шундай ҳаракат қилса, барибир натижа бўлади. Биз уйда ғалаба қозонишимиз керак эди, шунда ўзимиздан юқорида турган жамоаларга етиб олардик. Афсуски, бугун ғалаба қозона олмадик. Лекин футболчиларимга охиригача курашганликлари учун, майдондаги меҳнатлари учун миннатдорлик билдираман.

Суҳроб Бердиевнинг тикланиш жараёнлари биз кутганимиздан кўра анча чўзилиб кетди. Ҳали машғулотларга қўшилгани йўқ. Тахминан бир ойдан кейин унинг майдонга чиқишига умид қилсак бўлади.

Бугун захирадан майдонга тушган футболчилар ўйинни кучайтира олишди. Маликжонов, Сидоров, Хожимирзаев биз кутган ўйинни намойиш қилди. Биз бугун биринчи бўлимда марказда тўп назоратини кўпроқ йўқотдик. Иккинчи бўлимда тўлиқ ўйин назорати жамоамиз томонида бўлди.

Жамоамиздаги футболчилар ўтган мавсумдаги ва бу мавсумдаги ўйинлари билан ҳар қандай жамоага қарши бемалол кураша олишини кўрсатмоқда. Битта мени қониқтирмаган ҳолат, марказда диспетчер ўйинчи йўқлиги бўляпти. Якуба Бамба тўп билан муомаласи яхши. Лекин унинг ўйини қовушмаса захирамизда унинг ўрнини тўлдирадиган футболчи йўқ. Қисқа қилиб айтсам, Қувондиқ Рўзиевнинг ўрнини босадиган футболчи топа олмадик. Дилшод Раҳматуллаевни сўнгги вазиятда жамоамизга таклиф қила олмай қолдик. Бамба тезроқ биз кутган ўйинни намойиш қилса, янада кучаямиз. Биз “Пахтакор”дан бошқа барча жамоалар билан бемалол рақобатлаша оламиз. Тан олиш керак, ҳозирги кунда “Пахтакор” юртимиздаги энг кучли жамоа. Мен йигитларимга ишонаман, бугун йўқотган очколаримизни кейинги ўйинларда жойига қўя олишади. Мухлисларимизга ҳам ишонаман, улар бизни ҳеч қачон ёлғизлатиб қўйишмайди. Биз бугун мухлисларимиз олдида қарздор бўлиб қолдик ва албатта кейинги ўйинларда қарзимизни узамиз.

Албатта Шуҳрат Мақсудов яхши жамоа тузган. Жамоамиз номидан “Бунёдкор” га ва Шуҳрат Мақсудовга кейинги ўйинларда омад тилайман, - дея фикрини якунлади Ашурматов.