"Барселона"га пенальти берилиши керак эди — Хавьер Эстрада Фернандес ВАР ишини танқид қилди
- 7-май 2025, 17:07
- Bilolbek Imomov
- 1
- Футбол
Ярим финал “Интер”га қарши жавоб учрашувида (3:4) Чемпионлар лигасидан чиқиб кетган “Барселона” бир қанча тортишувли эпизодларга дуч келди. Улардан бири — 68-дақиқада Ламин Ямалга нисбатан Генрих Мхитаряннинг ҳаракати бўлди.
Ҳар қандай ҳолатда ҳам дастлаб бош ҳакам Шимон Марчиняк пенальти белгилади, аммо ВАР билан маслаҳатлашганидан сўнг қарорини ўзгартириб, фақат жарима зарбасига тўхталди.
Бу қарорни танқид қилган собиқ ҳакам Хавьер Эстрада Фернандес Esport3’га қуйидагиларни айтди:
– Бу ВАР томонидан йўл қўйилган жуда катта хатолик. Бу очиқ-ойдин пенальти эди. Ҳар икки ҳолатда ҳам контакт бор, биринчи тўқнашув қаерда бўлганини аниқ кўрсатмадилар. Бунинг учун аниқ бурчакдан олинган кадр керак эди.
– Аммо энг муҳими — эпизод давом этди ва кейинчалик яна бир контакт (тўқнашув) бўлди: тизза ёки оёқ билан. Бу албатта жазо майдонида ёки унинг чизиғида рўй берди. Шунинг учун ВАР аралашиб, пенальти тайинлаш керак эди ёки ҳеч бўлмаса, Марчинякга аввалги қарорини ўзгартирмасликни айтсин.