“Барса” юлдузи супертаклифни рад этди
- 21-июн 2025, 08:29
- Zohir Toshxo’jayev
- 0
- Футбол
“Барселона” бош мураббийи Ханс-Дитер Фликнинг келажакдаги режаларига киритилмаган тажрибали ҳимоячи Андреас Кристенсен ёзда бошқа жамоага ўтиши кутиляпти.
Даниялик футболчи атрофидаги вазиятни кузатиб бораётган Саудия Арабистони клубларидан мўмай даромадли таклиф тушди. Бироқ Андреас Европани тарк этишни истамаяпти ва шайхларнинг чорловига рад жавобини берди.
Diario Sport нашрининг маълум қилишича, 29 ёшли футболчининг асл мақсади Ханс-Дитер Фликнинг ишончини қозониш ва фаолиятини “Барселона”да давом эттиришдан иборат.
Агар бунинг имкони бўлмаса, Кристенсен “Милан”га кўчиб ўтишни режалаштирмоқда. Умуман олганда, даниялик футболчи келажагини Италия ёки Испания клублари билан боғлашга умид қилмоқда.
Андреас Кристенсен Каталонияга 2022 йили келган эди. Якунланган мавсумда жароҳат туфайли атиги олтита учрашувда қатнашди холос. Бу футболчи асосий таркибдаги жойини йўқотиб бўлган.